Italia triumfon në “Olimpiko”, mund me spektakël Turqinë 3:0

Euro 2020 ka nisur me superioritetin e Italisë përballë Turqisë, në Grupin A, në një 90 minutësh në “Olimpiko” të Romës, që ka sinjalizuar dhe nisjen e edicionit të 16-të të Kampionatit Europian, që rikthehet pas pesë vitesh. E nisur si favorite, skuadra e drejtuar nga Mancini ka treguar gjithë potencialin e saj, duke mos lënë asnjë mundësi për kundërshtarin.

Në 45 minutat e para nuk ka gola, por një Itali kërkuese përballë një Turqie që në asnjë moment nuk arrin të dalë nga kurthi që i kishte rezervuar kundërshtari. Nuk kanë munguar dhe pretendimet për 11-metërsh, të paktën në dy moment për italianët dhe në një për turqit. Po gjyqtarët e kanë konsideruar gjithçka të rregullt, për të mbyllur në 0-0 aktin e parë të kësaj sfide.

Pjesa e dytë ka tjetër histori. Italianët arrijnë të gjejnë golin e avantazhit në minutën e 58-të. Demiral ka shkaktuar autogol, duke devijuar në portë një top të krosuar nga Berardi. Një gol që e zhyt më shumë në vështirësi skuadrën e Gunes, ndërsa Italia arrin të gjejë dhe golin e dytë në minutën e 65-të me anë të Imobile.

Nuk vonon shumë dhe Lorenco Insinje ka vendosur emrin e tij në listën e golashënuesve për këtë sfidë. Është pikërisht minuta e 79-të e takimit dhe sulmuesi i Napolit ka konkretizuar një kombinim mes Barela dhe Imobile. Dominim i frikshëm i italianëve, 3-0, që mbetet në fuqi deri në sinjalizimin e fundit të gjyqtarit.

Statistika:

• Italia shënoi tre gola në një ndeshje të Kampionatit Europian për herë të parë.
• Kjo është hera e parë në historinë europiane që goli i parë i turneut ishte një autogol.
• Për herë të parë në Kampionatin Europian, Italia shënoi me një autogol.
• Ciro Immobile tani ka arritur 14 gola me kipin kombëtar, golashënuesi më i mirë së bashku me Balotelli në mesin e lojtarëve aktivë.
• Në fushë kundër Turqisë, Giorgio Chiellini merr pjesë në Kampionatin e tij të katërt Europian, duke barazuar rekordin e Gianluigi Buffon dhe Alessandro Del Piero.
• Giorgio Chiellini (36 vjeç e 301 ditë) tani është bërë lojtari më i vjetër në fushë që luan një ndeshje europiane me fanellën e Italisë.
• Gianluigi Donnarumma (22 vjeç e 106 ditë) është bërë sot portieri më i ri në Itali që luan në një ndeshje midis Kampionatit Europian dhe Kupës së Botës.
• 14 goditje për Italinë në pjesën e parë: maksimumi për një skuadër pa gol në pjesën e parë në Kampionatin Europian që nga nga Rusia kundër Greqisë në 2012 (16).
• Italia goditi 14 herë më shumë se Turqia në pjesën e parë (14-0), diferenca më e madhe në gjuajtjet e pjesës së parë në një ndeshje të Kampionatit Europian që nga viti 2004, kur Hollanda kishte provuar 16 dhe Letonia një.