Kaja Kallas takohet me Vuçiçin dhe Kurtin në Nju Jork: “Ka ardhur koha të ecet përpara”

Përfaqësuesja e Lartë e BE-së për Politikën e Jashtme dhe Sigurinë, Kaja Kallas, është takuar të martën në Nju-Jork, veç e veç, me presidentin e Serbisë Aleksandar Vuçiç dhe kryeministrin e Kosovës Albin Kurti, në kuadër të punimeve të Asamblesë së Përgjithshme të OKB-së.

Në takim me dy liderët, Kallas kërkoi që Beogradi dhe Prishtina të ecin përpara me normalizimin e marrëdhënieve dhe avancimin drejt rrugës evropiane. “Përparimi i normalizimit të marrëdhënieve dhe avancimi në rrugën drejt BE-së duhet të shkojnë dorë për dore”, shkroi ajo në rrjetin X pas takimeve.

Kallas theksoi se marrëveshjet e arritura përmes dialogut të lehtësuar nga BE-ja, veçanërisht marrëveshja e Ohrit, janë detyruese për të dyja palët. “Zbatimi i tyre nuk është nder për Brukselin, por detyrim ndaj qytetarëve të tyre dhe rajonit që pret marrëdhënie normale”, thuhet në mesazhin e saj.

Përfaqësuesja e Lartë e BE-së shtoi se Brukseli do të vazhdojë të jetë arbitër i paanshëm në dialog, por lehtësimi nuk mund të zëvendësojë vullnetin politik në Beograd dhe Prishtinë. Ajo e mbylli mesazhin e saj me thirrjen: “Ka ardhur koha të ecet përpara”.

Takimet u zhvilluan në margjinat e sesionit vjetor të Asamblesë së Përgjithshme të OKB-së në Nju-Jork, ku Kallas po ndjek punimet së bashku me liderë të shumtë botërorë.

Burimi: Nova.rs