Kallas njofton zgjerimin më të madh të listës së sanksioneve të BE-së ndaj Rusisë: rreth 1 600 emra të rinj

Shefja e politikës së jashtme të Bashkimit Evropian, Kaja Kallas, njoftoi të hënën zgjerimin më të madh të listës së sanksioneve të BE-së ndaj Rusisë që nga fillimi i luftës, siç njofton The Kyiv Independent.

“Ky është zgjerimi më i madh i vetëm i listës sonë të sanksioneve që kur Rusia nisi luftën”, tha Kallas në prag të takimit të Këshillit të Punëve të Jashtme të BE-së në Luksemburg, duke shtuar se më shumë se gjysma e rreth 1 600 emrave të rinj “lidhen me zinxhirin e prodhimit të raketave balistike” ruse.

Zgjerimi shënon hyrjen formale në fuqi të paketës së 19-të të sanksioneve, për të cilën 27 vendet anëtare ranë dakord më 7 tetor. Me këtë valë — 1 646 emra sipas analizave ligjore të publikuara për paketën — numri i përgjithshëm i të listuarve i afrohet 4 650.

Paketa e 19-të godet burimet kryesore të të ardhurave të Moskës: ndalimin e importit të gazit natyror të lëngshëm (LNG) rus — kontratat afatgjata nga 1 janari 2027 dhe ato afatshkurtra brenda gjashtë muajsh — shtrëngimin e ndalimit të transaksioneve për gjigantët shtetërorë të naftës Rosneft dhe Gazprom Neft, si dhe sanksione ndaj dy rafinerive kineze dhe një tregtari nafte që blejnë naftë ruse. Ajo shton edhe 117 anije të “flotës hije” ruse në listën e ndalimit të hyrjes në porte, duke e çuar totalin në 557 anije.

Masa të tjera përfshijnë sanksionet ndaj stablecoin-it rus A7A5, ndalime transaksionesh për pesë banka ruse dhe tetë banka e tregtarë nafte të vendeve të treta, si dhe detyrimin që diplomatët rusë të njoftojnë paraprakisht lëvizjet brenda zonës Schengen — masa që Brukseli i quan kundërpeshë ndaj përpjekjeve ruse për destabilizim.

Në të njëjtin takim, ministri i Jashtëm i Lituanisë, Kęstutis Budrys, kërkoi shtrëngim të mëtejshëm të presionit: “Vetëm kur t’i rrisim sanksionet, kur të tregojmë se e kemi seriozisht, do t’ia mohojmë Rusisë mundësinë të bëjë kërdinë në kryeqytetet tona”, tha ai.

E pyetur për marrëveshjen e SHBA-së për blerjen e dizelit rus, ministrja e Jashtme e Letonisë, Baiba Braze, e ktheu gishtin nga vetë BE-ja: “Le ta shohim veten. BE-ja fillimisht hoqi nga sanksionet dy oligarkë të mëdhenj rusë, mbështetësit më të mëdhenj të regjimit të Putinit”, tha ajo, siç citohet nga The Kyiv Independent.

Kallas ka premtuar se “paketa e 19-të nuk do të jetë e fundit”, ndërsa Brukseli thotë se po bëhet “gjithnjë e më e vështirë për Putinin ta financojë këtë luftë”.