Kamioni në Bijelo Polje mbante 16 tonë mbi peshën e lejuar, gjobitet kompania dhe shoferi

Policia e Bijelo Poljes, pas denoncimeve për bllokim të kalimit në fshatin Barice, konstatoi parregullsi serioze te kompania “Nj.” dhe kamioni i saj që transportonte trungje, siç njofton CdM.

Kamioni rezultoi teknikisht i parregullt dhe mbante një ngarkesë prej 16.080 kilogramësh mbi kapacitetin e lejuar, ndërsa trungjet e drurit ishin të shënuara në mënyrë të parregullt. Shoferi u dërgua në kontroll teknik dhe në peshim të mjetit.

Ndaj shoferit u lëshuan dy urdhëra kundërvajtjesh në shumën totale prej 830 eurosh, ndërsa ndaj kompanisë dhe personit përgjegjës u kërkua nisja e procedurës për katër kundërvajtje nga fusha e sigurisë në trafik, njofton Vijesti.

Edhe inspektori i pylltarisë lëshoi një urdhër për shënimin e trungjeve, ndërsa rasti u raportua edhe nga RTCG, sipas së cilës firma u sanksionua për mjetin teknikisht të parregullt dhe të mbingarkuar.