Kataib Hezbollah i vë ultimatum Irakut: Hiqni “bllokadën ajrore” ndaj Iranit ose do të rrëzojmë avionët
Grupi i armatosur i mbështetur nga Irani kërcënoi se do të rrëzojë "avionët armiqësorë" që shkelin hapësirën ajrore të Irakut, duke i vënë Bagdadit afat deri të mërkurën për t'i dhënë fund asaj që e quan bllokadë ajrore ndaj Iranit.
Kataib Hezbollah, grupi i armatosur irakian i mbështetur nga Irani, i ka bërë thirrje qeverisë së Bagdadit t’i japë fund asaj që e përshkruan si “bllokadë ajrore” të imponuar ndaj Iranit, duke paralajmëruar se do të rrëzojë “avionët armiqësorë” që shkelin hapësirën ajrore të Irakut, siç raporton Al Jazeera.
Grupi akuzoi kryeministrin irakian se po dorëzohet para presionit amerikan dhe se ka lejuar mbylljen e hapësirës ajrore të Irakut për avionët iranianë që nga e enjtja, si dhe akuzoi Shtetet e Bashkuara se po “rrethojnë” Iranin.
Në një deklaratë të martën, Kataib Hezbollah vendosi një afat deri të mërkurën për plotësimin e kërkesave të tij, duke paralajmëruar se do të marrë “një seri masash”, përfshirë mbylljen e pikave kufitare të Irakut, nëse Bagdadi nuk vepron.
Grupi kërkoi gjithashtu tërheqjen e plotë të koalicionit të udhëhequr nga SHBA nga bazat ushtarake në Irak, veçanërisht nga baza ajrore Ain al-Asad dhe ajo që e përshkroi si “dhomën amerikane të operacioneve” në Erbil.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.