Kati i 10-të i ndërtesës i shkatërruar, pamjet pas sulmit me dronë në Rumani (FOTO)

Sulmi me dronë në Rumani ka lënë dëme të shumta materiale. Droni rus goditi një pallat apartamentesh në Rumani, duke shkaktuar zjarr dhe duke plagosur dy persona. Incidenti ndodhi të premten në qytetin lindor të Galatit -pranë kufijve lindorë të Rumanisë me Ukrainën dhe Moldavinë.

Siç shihet edhe nga pamjet, ndërtesa ku ka rënë droni ka shkatërruar tëresisht banesën e cila është shkrumbuar nga flakët.

Shërbimet e emergjencës së Rumanisë thanë se e gjithë ngarkesa shpërthyese e dronit shpërtheu dhe shkaktoi zjarr në katin e 10-të të ndërtesës së apartamenteve.

Dy persona morën trajtim mjekësor për gërvishtje dhe rreth 70 persona u evakuuan ndërsa zjarri u shua.

Dronët rusë kanë kaluar kufirin e Rumanisë disa herë gjatë luftës katërvjeçare me Ukrainën, por kjo është hera e parë që civilë nga vendi i NATO-s janë plagosur. Rusia ende nuk ka komentuar për incidentin.

Lidhur me ngjarjen janë informuar të gjithë aleatët e NATO-s dhe partnerët e Bashkimit Evropian. Komunikimi me strukturat ushtarake aleate është i vazhdueshëm.

Rumania u ka kërkuar zyrtarisht aleatëve të vendosin aftësi shtesë kundër dronëve në territorin kombëtar për të forcuar mbrojtjen e saj dhe krahun lindor të aleancës.

Rumania gjithashtu do të informojë zyrtarisht Këshillin e Sigurimit të Kombeve të Bashkuara për atë që e quan një shkelje brutale dhe të përsëritur të së drejtës ndërkombëtare nga Federata Ruse.