“Kemi punuar gjatë për këtë moment”, Rama nga Belgjika: Pro anëtarësimit pa të drejtë vetoje

Kryeministri Edi Rama është pritur këtë të martë, 26 maj, në Bruksel nga kryeministri i Belgjikës, Bart De Weber, aty ku sot mbahet Konferenca e 8-të Ndërqeveritare mes Shqipërisë dhe Bashkimit Europian, e cila hap zyrtarisht rrugën për kalimin e Shqipërisë në fazën përmbyllëse të negociatave për anëtarësim në BE.

“Është një çast i rëndësishëm në rrugën tonë drejt anëtarësimit në BE. Është një moment për të cilin kemi punuar shumë prej një kohe shumë të gjatë. Gjysma e punës për hapjen e të gjithë grupkapitujve është bërë dhe tashmë është koha për të mbyllur të gjithë grupkapitujt.”, tha Rama.

I pyetur nga një gazetar lidhur me opsionin e anëtarësimit të Shqipërisë pa të drejtën e vetos, kryeministri u shpreh: “Unë e kam promovuar këtë ide prej disa vjetësh sepse e kemi provuar prej vitesh. Sepse çështja e zgjerimit nuk ka qenë aq e pranishme në kryeqytetet europiane dhe kjo ka bërë të dalim me propozime të tjera. Unë e kam mbështetur këtë. Nuk bëhet fjalë vetëm për një anëtarësim të lehtë, pra me pak të drejta në BE, por natyrisht ne kërkojmë anëtarësim të plotë së bashku me reformimin e plotë të BE-së.”

---

Kjo konferencë vjen pas vendimit të Komitetit të Përfaqësuesve të Përhershëm të shteteve anëtare të BE-së (COREPER), i cili konfirmon përmbushjen e objektivave të ndërmjetëm në grupkapitullin “Themeloret”, si dhe përcakton objektivat përmbyllës për Kapitullin 23, “Gjyqësori dhe të Drejtat Themelore”, dhe Kapitullin 24, “Drejtësia, Liria dhe Siguria”.

Sipas agjendës zyrtare, Hapja e Konferencës Ndërqeveritare do të bëhet rreth orës 19:00, ndërsa në përfundim të takimit pritet të zhvillohet edhe një konferencë për shtyp. Kjo pritet të zhvillohet rreth orës 20:15

---

Kujtojmë se takimi paraardhës i këtij niveli u mbajt në nëntor të vitit 2025, kur u hap grup-kapitulli i fundit i negociatave me BE, “Bujqësia dhe Kohezioni”. Gjë që sipas kreut të qeverisë u arrit në një kohë rekord, për vetëm 12 muaj!

Viti që lamë pas shënoi një sërë momentesh kyçe sa i takon këtij procesi, që pikënisjen e pati në korrik të 2022-it, kur u çelën negociatat. 16 vjet pas firmosjes së marrëveshjes së Stabilizim-Asociimit, u bë realitet ëndrra e kahershme e shqiptarëve për rrugëtimin e vendit drejt Unionit.

Megjithatë, siç e ka deklaruar edhe Komisionerja për Zgjerimin e BE-së, Marta Kos, “tanimë mbyllja e grup-kapitujeve është çmimi real për Shqipërinë”.  

“Vijoni me reformat”, ka qenë apeli i vazhdueshëm nga ndërkombëtarët, por realizimi i të gjithë detyrave mbetet një proces kompleks. Vetë kryeministri ka deklaruar se ka disa fusha ku nevojitet më shumë punë.

“Sfida e sfidave”, për të është grup-kapitulli që lidhet me sigurinë ushqimore dhe mbrojtjen e konsumatorit.