Kërkesat për ndihmë papunësie në SHBA rriten në 200 mijë, por tregu i punës mbetet i fortë

Numri i amerikanëve që paraqitën kërkesa të reja për ndihmë papunësie u rrit javën e kaluar, por mbeti në një nivel që, siç njofton Reuters, përputhet me një treg pune që po forcohet. Kërkesat fillestare për ndihmë shtetërore papunësie u rritën me 9.000, në 200.000 të rregulluara sezonalisht, për javën e përfunduar më 7 nëntor, njoftoi të enjten Departamenti i Punës. Ekonomistët e anketuar nga Reuters kishin parashikuar 195.000 kërkesa.

Kërkesat kanë mbetur në 200.000 ose poshtë këtij niveli që nga mesi i shtatorit dhe qëndrojnë pranë nivelit 189.000 të arritur në mesin e korrikut, më i ulëti që nga viti 1969, çka ngre mundësinë që tregu i punës të jetë duke u shtrënguar. Javën e kaluar qeveria raportoi një rritje të fortë të vendeve të punës jashtë bujqësisë në tetor dhe rënie të shkallës së papunësisë në 4,1 për qind, nga 4,2 për qind në shtator.

Raporti tregoi se numri i personave që marrin ndihmë papunësie pas javës së parë — një tregues për punësimin — ra me 20.000, në 1,697 milionë të rregulluara sezonalisht, në javën e përfunduar më 31 tetor.

Disa ekonomistë nuk besojnë se tregu i punës po rishtrëngohet, ndërsa të tjerë argumentojnë se forca më e vogël e punës, për shkak të daljeve në pension dhe të ashpërsimit të politikës së emigracionit nga administrata e presidentit Trump, është shtytësi kryesor i nivelit historikisht të ulët të kërkesave. Ekonomistja e Citigroup-it, Veronica Clark, thotë se një forcë pune përgjithësisht më e vogël mund të nënkuptojë më pak punëtorë që paraqesin kërkesa për sigurim papunësie dhe se kërkesat e vazhdueshme sugjerojnë që papunësia mund të bjerë edhe më tej, drejt rreth 4,0 për qind, në të dhënat e fillimit të vitit 2027.

Kërkesat e vazhdueshme nuk përfshijnë disa të papunë, përfshirë të sapodiplomuarit dhe persona të tjerë me pak ose aspak historik pune; disa persona mund edhe t’u ketë skaduar e drejta e përfitimit, e kufizuar në 26 javë në shumicën e shteteve.