KIEV – 16 të vrarë pas sulmit rus në qytetin e lindjes së Zelenskyt

KIEV, 22 gusht /ATSH-DPA/ – Numri i të vdekurve nga një sulm me dron rus në një qendër tregtare në qytetin e lindjes së presidentit ukrainas Volodymyr Zelensky, Kryvyi Rih, është rritur në të paktën 16, thanë sot autoritetet ukrainase të mbrojtjes civile, ndërsa Kievi shënjestroi Moskën me dronë.

Zyrtarët e mbrojtjes civile në Kryvyi Rih thanë se nëntë persona ende rezultojnë të zhdukur pas sulmit të së premtes, përfshirë dy fëmijë.

Disa persona me lëndime serioze ende po trajtohen në spital, me një total prej 130 të plagosur të raportuar.

Rusia gjithashtu goditi përsëri kryeqytetin ukrainas Kiev gjatë natës, duke vrarë të paktën një person dhe duke plagosur të tjerë, thanë autoritetet.

Një depo u përfshi nga zjarri në sulm, i cili ndodhi ndërsa ministri i Jashtëm gjerman, Johann Wadephul udhëtoi në qytet për një vizitë solidariteti.

Ministria ruse e Mbrojtjes tha se një depo hekurudhore që strehonte lokomotiva u godit. Mbrojtja ajrore e Ukrainës kishte paralajmëruar më parë për një sulm me raketa balistike në Kiev, i cili është goditur vazhdimisht në javët e fundit për shkak të mungesës së njësive të mbrojtjes ajrore./ a.jor.