KIEV – Burnham: Ukraina mban gjallë “Flakën e Lirisë” evropiane

KIEV, 24 gusht /ATSH-DPA/- Ukraina po mban gjallë Flakën e Lirisë evropiane përmes rezistencës së saj ndaj Rusisë, tha sot kryeministri britanik Andy Burnham, gjatë vizitës në Kiev, ku liderët evropianë u mblodhën për të shënuar 35-vjetorin e pavarësisë së Ukrainës.

Në një fjalim pranë Katedrales së Shën Sofisë, së bashku me presidentin ukrainas Volodymyr Zelensky dhe presidentin e Këshillit Evropian António Costa, Burnham vlerësoi forcën dhe qëndresën e popullit ukrainas.

Ai e cilësoi Ukrainën si mbrojtësen e Evropës, duke theksuar se vendi nuk është barrë për sigurinë evropiane, por vija e parë e mbrojtjes që e mban Evropën të sigurt.

Burnham e krahasoi luftën e Ukrainës kundër Rusisë me rezistencën e Britanisë së Madhe ndaj Gjermanisë naziste, gjatë Luftës së Dytë Botërore.

“Kombi im e mbajti gjallë Flakën e Lirisë evropiane në shekullin XX, ju po e mbani atë flakë gjallë në shekullin XXI”, tha ai.

Kjo ishte vizita e parë e Burnham jashtë vendit, që prej marrjes së detyrës së kryeministrit në korrik.

Ai mbërriti në Ukrainë me tren dhe vendosi kurora me lule në varrezat kombëtare ushtarake, përpara ceremonisë së Ditës së Pavarësisë.

Mbështetje për raketat me rreze të gjatë

Përpara vizitës, qeveria britanike njoftoi se do të ndihmojë Ukrainën në prodhimin e raketave me rreze të gjatë SCALP, duke i dhënë Kievit projektet për komponentët britanikë.

SCALP është versioni francez i raketave britanike “Storm Shadow”, të cilat Ukraina i ka përdorur për të goditur objektiva në territorin rus.

Ukraina dhe Franca po shqyrtojnë gjithashtu ngritjen e linjave të prodhimit të këtyre raketave brenda Ukrainës.

Rusia ka dënuar mbështetjen britanike për sulmet ukrainase. Ministri i Jashtëm rus Sergei Lavrov ka paralajmëruar se përfshirja e drejtpërdrejtë britanike në përdorimin e raketave mund të konsiderohet pjesëmarrje në luftë.

Burnham u përgjigj se kërcënimet ruse nuk do ta ndalin Londrën.

“Pavarësisht kërcënimeve të papranueshme të Rusisë ndaj vendit tim, ne do të vazhdojmë mbështetjen për Ukrainën”, tha ai.

Gjatë ceremonisë, Zelensky i dorëzoi Burnham një dekoratë në shenjë vlerësimi për mbështetjen e Britanisë së Madhe ndaj Ukrainës.

Në fjalimin e tij për Ditën e Pavarësisë, Zelensky deklaroi se Ukraina nuk do t’i nënshtrohej Rusisë, duke thënë se ukrainasit nuk do të bëheshin gurë kalldrëmi nën këmbët e carëve dhe sundimtarëve.

Përplasjet politike në Ukrainë

Vizita e Burnham zhvillohet në një moment kur Zelensky po përballet edhe me tensione të brendshme politike.

Ish-ministri i Mbrojtjes, Mykhailo Fedorov, i shkarkuar muajin e kaluar, pas një përplasjeje me drejtuesin e forcave të armatosura ukrainase, ka kërkuar që Zelensky të shpallë zgjedhje.

Fedorov ka kërkuar gjithashtu që Zelensky të japë shpjegime lidhur me atë që dinte për akuzat për korrupsion brenda rrethit të tij të ngushtë.

Javën e kaluar, autoritetet ukrainase kundër korrupsionit, njoftuan se kishin zbuluar një skemë të dyshuar pastrimi parash, pas së cilës Zelensky shkarkoi një zyrtar të lartë të dyshuar për përfshirje.

Presidenti ukrainas ka mohuar çdo përfshirje, duke deklaruar se drejtuesit e institucioneve kundër korrupsionit “nuk kanë asnjë pyetje” ndaj tij dhe se ai nuk është i përfshirë në një skemë të tillë. /