KIEV – Zelensky shënon Ditën e Pavarësisë: Rusia duhet të ulë kokën dhe të vuajë pasojat

KIEV, 24 gusht /ATSH-DPA/- Presidenti ukrainas Volodymyr Zelensky sfidoi drejtpërdrejt presidentin rus Vladimir Putin, në fjalimin e tij me rastin e 35-vjetorit të pavarësisë së Ukrainës, duke deklaruar se Rusia duhet të detyrohet të ulet në tryezën e negociatave përmes unitetit të komunitetit ndërkombëtar.

Në një videomesazh rreth 20 minuta të gjatë, Zelensky vlerësoi qëndresën e popullit ukrainas gjatë më shumë se 1640 ditëve të luftës në shkallë të plotë.

Sipas tij, Rusia e ka nënvlerësuar popullin ukrainas, duke u përqendruar te burimet, armët dhe pajisjet ushtarake të Ukrainës, por duke mos llogaritur faktorin më të rëndësishëm, njerëzit që mbrojnë vendin dhe pavarësinë e tij.

Zelensky tha se Ukraina ka arritur rezultate të rëndësishme gjatë luftës, veçanërisht në zhvillimin e industrisë së mbrojtjes.

Ai përmendi dronët detarë, mjetet robotike, sulmet ndaj logjistikës ruse dhe goditjet me rreze të gjatë ndaj rafinerive të naftës.

Presidenti ukrainas hodhi poshtë sërish kërkesën e Rusisë që Ukraina të heqë dorë nga rajoni i Donetskut, duke argumentuar se askush nuk beson se një lëshim i tillë do t’i jepte fund luftës.

“Ne nuk u besojmë atyre”, tha Zelensky, duke shtuar se Ukraina nuk është më një viktimë, por “një luftëtare”.

Zelensky i bëri gjithashtu thirrje Kinës të mos qëndrojë më neutrale dhe të përdorë ndikimin e saj për të kundërshtuar kërcënimet e diktatorëve dhe luftërat.

Ai vlerësoi edhe qasjen e SHBA-së nën drejtimin e presidentit Donald Trump, duke thënë se Uashingtoni tashmë e kupton se Putini nuk dëshiron t’i japë fund luftës.

Në përfundim, Zelensky kërkoi forcimin e presionit ndërkombëtar ndaj Moskës.

“Rusët duhet të sillen në tryezën e negociatave. Duhet të vendosen sanksione që do t’i bëjnë të vuajnë”, tha ai. /