Kiko lutet për mos ndërprerjen e financimeve për Shqipërinë

Kiko i shqetësuar tej mase nga lajmet që mori nga Kuvendi dhe media për ndërprerjen e financimeve të Komisionit Europian për bujqësinë, e kaloi natën duke shkruar një lutje për të kontribuar sadopak në debatin e ditës.

I trembur se pasojat do t’i vuanin në radhë të parë majmunët, Kiko u angazhua personalisht për të shpërndarë lutjen te çdo çadër plazhi dhe çdo fermer i zonës

Dekalogu i lutjeve të një nate vere:

1-O Zot i plotfuqishëm, bëje që nga fondet e IPARD II, asnjë cent të mos ketë shkuar te biznesmenë të dënuar, të skeduar, të kërkuar në vendet e BE për vrasje, kokainë apo prostitucion, bëje që asnjë projekt të mos jetë kopsitur në zyrat e AZHBR!

2-O Hyjni, bëje që asnjë cent të jetë harxhuar në projekte fiktive që ekzistojnë vetëm në letra apo në D3.

3-O i Madhërishëm të përgjërohem që asnjë cent të mos jetë devijuar në projekte që nuk kanë lidhje me zhvillimin rural.

4-O i Gjithpushtetshëm bëj që asnjë cent të ketë shkuar te familjaret e zyrtarëve e politikanëve, te besnikët e partisë dhe të qeverisë dhe te patronazhistët.

5-O Mbret i qiellit dhe i tokës bëje të mundur që asnjë cent të mos jetë derdhur si përqindje komisioni për fitimin e projekteve.

6-O Ati ynë edhe nëse kanë marrë ndonjë cent padashje, trego mëshirë, trajtoji si prapësira fëmijësh që kanë nevojë për riedukim pedagogjik.

7-O Mëshirëplot zbutja zemrën OLAF-it se shpërndarësit e fondeve të IPARD II këtu janë gjini e pashkollë dhe kanë nevojë për trajnim.

😯 Mëshirëmadh, ëmbëlsoja shpirtin Zyrës Europiane të Prokurorisë Publike që ta kursejë Shqipërinë këtë herë. Ndalja dorën Komisionit Europian dhe mos ndërprisni financimin e IPARD III.

9-O Perëndi e diellit dhe e Hënës, ndriçoja rrugën SPAK-ut që të mos kapë ndonjë hajdut të vockël në errësirë.

10-O Zot i Madh, bëje që vjedhja e prezumuar e parave te taksapaguesve europianë të jetë vetëm e thjesht ëndërr e keqe e një nate të nxehtë vere!