Kili, 4 milionë njerëz pa ujë të pijshëm
Stuhitë e shirave dhe rrëshqitjet e dheut në Kili kanë kontaminuar një lum të rëndësishëm, duke detyruar autoritetet të ndërpresin furnizimin me ujë të pijshëm për 4 milionë banorë në kryeqytetin Santiago.
Zyrtarët thonë se furnizimi me ujë nga lumi Maipo do të duhet të ndërpritet për thuajse të gjithë qytetin, derisa uji të rrjedhë i pastër.
Njerëzit janë furnizuar në ujë të blerë, ndërkohë, ndërsa autoritetet vendase urdhëruan restorantet dhe bizneset të qëndrojnë të mbyllura. Ata shtynë gjithashtu edhe nisjen e javës shkollore këtë të hënë.
Personeli i emergjencës tha se uji që vjen nga Andet ka bllokuar edhe rrugët, ndërsa ka izoluar mijëra njerëz.
Guvernatori rajonal i Santiagos, Claudio Orrego tha se “jemi duke folur për rreth 1.45 milionë shtëpi që do të preken nga ndërprerja e furnizimit me ujë të pijshëm, që do të jetë i plotë ose i pjesshëm në 30 qarqe”.
“Ende nuk e dimë se kur do të rikthehet uji i pijshëm. Nuk mund të garantojmë rifillimin e shërbimit furnizues, derisa ujërat e lumit Maipo të kthjelltësohen”, shtoi më tej ai. Sipas autoriteteve, rikthimi i ujit do të varet nga kushtet e motit dhe stuhitë që kanë kapluar zonat malore, të cilat shkaktojnë edhe reshje të dendura.
Të paktën 4 viktima janë shënuar nga përmbytjet deri më tani. Rajoni qendror i Kilit ka kaluar disa muaj thatësirë, si dhe është prekur nga zjarre vdekjeprurëse prej javësh të tëra.
