“KISCOMS”, UP-së : Mos u dorëzoni përballë kërkesave të jashtëligjshme

Organizata për Arsim, Shkencë dhe Shëndetësi “KISCOMS” fton Universitetin “Hasan Prishtina” dhe rektorin, Ramadan Zejnullahu, të mos dorëzohen përballë kërkesave, presioneve e kërcënimeve të OVL të UÇK-së për regjistrim të paligjshëm të mbi 1000 studentëve në njësi të ndryshme akademike të UP-së, pa iu nënshtruar testit të provimit pranues.

“Universiteti ‘Hasan Prishtina’ dhe MASHT, duhet të bëjnë të pamundurën për krijimin e kushteve sa më të mira dhe lehtësuese për fëmijët e dëshmorëve, të veteranëve dhe invalidëve të luftës së UÇK-së, duke i liruar ata nga pagesat për regjistrim të vitit akademik, pagesat për ushqim dhe fjetje në Qendrën e Studentëve si dhe të gjitha pagesat tjera administrative, duke përfshirë këtu edhe dhënien e bursave mujore e vjetore për të gjithë fëmijët e kësaj kategorie si dhe mbulimin e të gjitha shpenzimeve për kurse të ndryshme të gjuhëve të huaja dhe ato për aftësim profesional”, thuhet në reagimin e KICMOS.

Megjithatë “KISCOMS” e vlerëson të panevojshme kërkesën e Parlamentit të Studentëve për rritje të numrit të studentëve për 30 për qind, si dhe kërkesën e OVL të UÇK-së për pranimin e mbi 1000 studentëve në njësi të ndryshme akademike të UP-së, pa iu nënshtruar testit të provimit pranues.