Klopp ngre zërin: Pushimet e hidratimit? Përfitojnë vetëm sponsorët, futbolli peng i televizionit

“Futbolli është marrë peng nga drejtues të mbyllur në zyra të klimatizuara. Të ashtuquajturat pauza për hidratim janë prezantuar si një gjetje për mirëqenien e lojtarëve, por nuk janë gjë tjetër veçse një kafaz i artë i ndërtuar për sponsorët”.

Ky është qëndrimi i Jurgen Klopp, ish-trajneri i Liverpool-it teksa komenton Botërorin 2026 për rrjetin gjerman “ZDF”. Ai është i drejtpërdrejtë dhe jo pak kritik për atë që po ofron Kupa e Botës aktualisht.

“Kam parë lojtarët që ndaleshin gjatë pauzave për shkak të të nxehtit, ndërsa pauzat publicitare kanë diktuar ritmin e ndeshjes. Kush përfiton vërtet nga Kupa e Botës? Tifozët, futbollistët apo ata të reklamave?”, – ka shtuar Jurgen Klopp, një nga zërat më të ashpër për disa zgjedhje të FIFA-s në lidhje me eventin më të madh futbollistik të globit.