Nga 5 nëntori nis pagesa në sportel për klientët pa kartela të Alta Bankës në Manastir, deri në 20.000 denarë

Klientët e Alta Bankës AD Manastir që kanë llogari pagese, por nuk kanë kartela pagese, nga e enjtja, 5 nëntor, do të mund t’i tërheqin paratë në sportelet e filialës kryesore të bankës në Manastir, njoftoi Banka Popullore, siç raporton Fokus.

Për këtë qëllim do të hapen më shumë sportele në adresën rruga “Dobrivoje Radosavljeviq” nr. 21 në Manastir. Pagesa u drejtohet sidomos pensionistëve dhe përfituesve të ndihmës sociale, të cilët mjetet i marrin përmes llogarive në këtë bankë, por nuk kanë kartela pagese.

Sipas njoftimit të Bankës Popullore, qytetarët do të mund të tërheqin deri në 20.000 denarë, që është shuma maksimale e lejuar për tërheqje në një periudhë prej dy javësh. Nga 6 nëntori, përfshirë edhe të shtunën, 7 nëntor, filiala do të punojë me dy turne, në mënyrë që të shërbehen sa më shumë klientë.

Pagesa do të bëhet gjatë disa ditëve, sipas një orari për të cilin qytetarët do të njoftohen me SMS, ku do t’u tregohet dita dhe ora kur duhet të paraqiten. Banka Popullore u bën thirrje qytetarëve t’u përmbahen termineve të marra dhe të mos shkojnë në filialë në ditët kur nuk janë thirrur, për të shmangur radhët dhe pritjet e gjata; për ata që nuk do të mund të paraqiten në terminin e caktuar, do të sigurohen termine shtesë.

Sportelet do të jenë të destinuara vetëm për tërheqjen e parave të gatshme dhe në to nuk do të kryhen transaksione të tjera. Banka Popullore shtoi se po punohet edhe për hapjen e sporteleve për pensionistët dhe përfituesit e ndihmës sociale në qytete të tjera të vendit, për çka publiku do të njoftohet së shpejti.