Koalicioni i Giorgia Melonit pëson prapakthim pas humbjes së ngushtë në votimin për reformën zgjedhore

Qeveria e koalicionit të kryesuar nga Giorgia Meloni pësoi një goditje të rëndësishme pasi deputetët rrëzuan një amendament kyç për reformën zgjedhore në Dhomën e Deputetëve. Rezultati i ngushtë tregon për përçarje brenda radhëve qeveritare në prag të zgjedhjeve të ardhshme.

Në një votim me buletin të fshehtë, në seancën e mbrëmjes së së mërkurës, deputetët refuzuan propozimin të udhëhequr nga partia Vëllezërit e Italisë (FdI) me 188 vota ndaj 187, një shifër që tregon se disa deputetë të koalicionit votuan kundër, raporton bbc.co.

Meloni reagoi me zemërim në rrjetet sociale, duke e përshkruar rezultatin si “një mundësi të humbur për italianët”. Ajo nuk pranoi të largohet nga posti apo të thërrasë zgjedhje të parakohshme, edhe pse përplasjet me opozitën dhe brenda koalicionit u përshkallëzuan pas votimit, ndërsa partitë opozitare festuan rezultatet.

Amendamenti i rrëzuar kishte të bënte me votimin e preferencave, që do t’u lejonte zgjedhësve të shënonin kandidatët e preferuar brenda një liste. Reforma më e gjerë parashikon kalimin në një sistem proporcional të plotë me një bonus për partinë ose koalicionin me përqindjen më të madhe të votave dhe kërkon që koalicionet të bien dakord për një platformë të përbashkët dhe një kandidat të vetëm për kryeministër.

Brenda koalicionit, tensionet janë rritur ndërsa popullariteti i partive anëtare ka dobësuar dhe partnerët më të vegjël shfaqin rezervat e tyre, çka kontribuoi në dështimin e amendamentit. Ndërkohë, forcat qendër- të majta dhe të majta po përgatiten për të dalë të bashkuara kundër Melonit në zgjedhjet e ardhshme, pas fitores së tyre kolektive kundër referendumin kushtetues që qeveria mbështeti dhe që konsiderohet si goditja e parë e rëndë për ekuilibrin e saj politik. Një faktor tjetër në garë është formimi i partisë së re National Future (FN) nga Roberto Vannacci, që aktualisht matet rreth 6% në sondazhe, përpara Ligës me 5.6%, dhe që promovon politika euroskeptike dhe ide për “remigracion”.

Rruga përpara mbetet e pasigurt: përveç mundësisë së një votimi të parakohshëm ose ristrukturimi brenda ekzekutivit, nëse zgjedhjet zhvillohen në shtator 2027 Meloni mund të bëhet kryeministrja e parë që qeveris një mandat të plotë me një qeveri të vetme që nga 1946, sipas bbc.co.