KOMENT – Kroacia po i bllokon Malit të Zi rrugën drejt anëtarësimit në BE

ROMË, 28 korrik /ATSH-ANSA/ – Mali i Zi kryeson listën e vendeve kandidate për anëtarësim në Bashkimin Evropian, por ka një pengesë që po i bllokon rrugën dhe kjo është Kroacia.

Zagrebi ka vendosur një sërë kushtesh për dhënien e pëlqimit të tij për përparimin e Podgoricës, duke bllokuar negociatat me Brukselin për Kapitullin 31, i cili ka të bëjë me Politikën e jashtme, të Sigurisë dhe të Mbrojtjes.

Që në vitin 2024, Zagrebi kishte ngritur zyrtarisht mospëlqime duke kundërshtuar një rezolutë të miratuar nga Parlamenti i Podgoricës mbi gjenocidin e serbëve në kampin e shfarosjes fashiste ustashe në Jasenovac gjatë Luftës së Dytë Botërore.

Duke prekur një çështje të ndjeshme, Kroacia e konsideron këtë veprim politik si një provokim të nxitur nga Beogradi.

Sipas të përditshmes serbe ”Blic”, një raport i publikuar edhe nga ”Serbian Monitor”, Kroacia i ka kërkuar Malit të Zi të ndërmarrë hapa vendimtarë deri në fund të vitit për gjashtë çështje dypalëshe të pazgjidhura në mënyrë që të sigurojë dritën jeshile për vazhdimin e negociatave me BE-në.

Zagrebi po kërkon që Mali i Zi t’u paguajë kompensim ish-të burgosurve kroatë të mbajtur në kampet malazeze të të burgosurve të luftës dhe që të vazhdojë kërkimin për 14 personat që ende listohen zyrtarisht si të zhdukur nga Lufta Kroate e Pavarësisë (1991-1995), ndjekjen penale efektive të krimeve të luftës, zgjidhjen e mosmarrëveshjeve mbi pronën e konfiskuar nga familjet kroate, demarkacionin e kufijve detarë dhe kthimin e anijes stërvitore ”Jadran” si dhe ruajtjen e pllakës përkujtimore në vendin e ish-kampit Morinj në Mal të Zi, ku qindra kroatë u burgosën nga viti 1991 e tutje.

Pavarësisht pengesave të vendosura nga Kroacia, Mali i Zi po vazhdon punën e tij teknike me institucionet evropiane dhe ende konsiderohet të jetë në pozicionin kryesor.

Në mesin e korrikut 2026, Podgorica arriti të mbyllë përkohësisht dy kapituj të tjerë të rëndësishëm, duke e çuar totalin në 18 kapituj të mbyllur nga 33./  a.jor.