KOMENT – Trump i bën thirrje Zotit dhe kritikon komunizmin në 250-vjetorin e Amerikës

UASHINGTON, 4 korrik /ATSH-DPA/ – Presidenti i SHBA-së, Donald Trump, përdori një fjalim, të premten vonë në mbrëmje, për 250-vjetorin e Shteteve të Bashkuara, për të paralajmëruar bashkatdhetarët e tij kundër ideologjisë komuniste, duke paraqitur SHBA-në si një komb i rrënjosur në besim.

Duke folur para mbështetësve në shtetin amerikan të Dakotës së Jugut, me Malin e famshëm Rushmore si sfond në prag të Ditës së Pavarësisë, Trump tha se “mund të jesh komunist ose mund të jesh patriot”.

Trump e ka përdorur gjithnjë e më shumë termin “komunizëm” kohët e fundit për të sulmuar kundërshtarët e krahut të majtë vendas dhe qëndrimet e tyre.

Trump gjithashtu i cilësoi Shtetet e Bashkuara si një komb që shikonte nga Zoti.

“Të drejtat tona këtu na janë dhënë nga Zoti që na krijoi dhe këto të drejta nuk do të shkelen”, theksoi ai.

80-vjeçari shtoi se “asnjë vend tjetër nuk ka bërë më shumë të mira për këtë botë sesa Shtetet e Bashkuara të Amerikës”.

Ai theksoi se anglishtja flitej në SHBA sepse ishte gjuha e Etërve Themelues, pa përmendur se një numër shumë i madh njerëzish në SHBA flasin edhe spanjisht.

Mali Rushmore është i famshëm në botë për monumentin e tij presidencial, me kokat e gdhendura të George Washington, presidentit të parë, Thomas Jefferson, presidentit të tretë, Theodore Roosevelt, presidentit të 26-të dhe Abraham Lincoln, presidentit të 16-të.

Nuk ishte hera e parë që Trump kishte përdorur monumentin kombëtar të Malit Rushmore si sfond.

Gjashtë vjet më parë, në vetë Ditën e Pavarësisë, ai mbajti një fjalim atje duke mbledhur ndjenja kundër pjesëmarrësve në një lëvizje proteste mbarëkombëtare kundër racizmit.

E shtuna është pika kulmore e festimeve të 250-vjetorit të pavarësisë së saj nga Britania.

Një shfaqje e madhe fishekzjarresh është planifikuar për vonë në mbrëmje në Uashington, që do të nisë nga vende të shumta.

Evente janë planifikuar në të gjithë vendin, me festime të mëdha që do të zhvillohen në qytete duke përfshirë Nju Jorkun, Bostonin dhe Los Anxhelesin.

Në kryeqytetin, Uashington, festimet fillojnë me një paradë të Ditës së Pavarësisë përgjatë National Mall në mëngjes, e ndjekur nga një ditë ngjarjesh përkujtimore.

Avionët luftarakë ishin vazhdimisht mbi kokat e banorëve të Uashingtonit të premten, dhe më shumë fluturime priten të shtunën, me organizatorët që thonë se janë planifikuar më shumë se 30 fluturime.

”Air Force One”, avioni zyrtar i qeverisë, është planifikuar të bashkohet me spektaklin, duke fluturuar së bashku me bombarduesit amerikanë mbi kryeqytet.

Por, një faktor që e prish humorin për shumë njerëz është fakti se kryeqyteti i SHBA-së ka qenë nën vapën përvëluese prej rreth 40 gradë Celsius për ditë të tëra.

Trump nuk dekurajohet.

“Do të mbaj një fjalim vërtet të gjatë vetëm për të treguar se mund të bëj gjithçka”, tha ai.

Fjalimi i tij është planifikuar për në orën 09:45 (01:45 GMT sot).

Një paradë e madhe në qytet u anulua për shkak të nxehtësisë ekstreme.

Trump është aktualisht nën presion të fortë politik të brendshëm.

Lufta e Iranit në veçanti ka tërhequr kundërshtime të gjera në të gjithë vendin.

Vlerësimet e miratimit të tij kanë qenë të ulëta për njëfarë kohe, dhe shumë votues amerikanë janë të lodhur nga lufta, edhe pse qeveria amerikane përdor një etos luftëtari.

Presidenti ka shtuar paraqitjet e tij publike rreth festimeve të 250-vjetorit në ditët e fundit, duke përdorur fjalimet e tij për të nxjerrë në pah atë që ai e sheh si sukseset e mandatit të tij të dytë.

Dita e Pavarësisë përkujton miratimin e Deklaratës së Pavarësisë së Shteteve të Bashkuara më 4 korrik 1776, kur 13 kolonitë amerikane shpallën pavarësinë e tyre nga Britania e Madhe./  a.jor.