KOMENT – Trump kërcënon me tarifa 50% për makinat kanadeze, ndërsa lufta tregtare përshkallëzohet

UASHIGNTON, 24 gusht /ATSH-DPA/ – Presidenti i SHBA-së, Donald Trump, përshkallëzoi sot luftën tregtare të vendit me Kanadanë duke kërcënuar të rrisë tarifat për një gamë të gjerë importesh të mëdha kanadeze në 50% nga 1 janari 2027.

”Tarifat për makinat, kamionët e mëdhenj dhe të vegjël, pjesët e automobilave dhe çelikun do të rriten në 50%”, tha Trump në platformën e tij Truth Social.

“Ndërtoni në SHBA dhe do të ketë ZERO TARIFA,” shkroi Trump.

Sipas shifrave të qeverisë kanadeze, SHBA-të aktualisht vendosin tarifa prej 25% për makinat, kamionët dhe pjesët përkatëse të importuara sipas Seksionit 232 të Aktit të Zgjerimit të Tregtisë të vitit 1962.

Tarifat midis 10% dhe 50% vendosen gjithashtu për importet e çelikut, aluminit dhe bakrit.

Trump e justifikoi përsëri kërcënimin e tij duke akuzuar Kanadanë se po përfiton nga SHBA-të.

“Kanadaja ka vite që i ka mashtruar Shtetet e Bashkuara të Amerikës”, shkroi ai, ndërsa pretendoi gjithashtu se SHBA-të nuk varen nga tregtia me fqinjin e saj.

“NE NUK KEMI NEVOJË PËR KANADANË, AJO KA NEVOJË PËR NE!” shkroi Trump.

Megjithatë, sipas shifrave të Regjistrimit të SHBA-së, Kanadaja është aktualisht partneri i dytë më i madh tregtar i Shteteve të Bashkuara. Nga janari deri në qershor, SHBA-të importuan mallra me vlerë rreth 200 miliardë dollarë nga Kanadaja dhe eksportuan rreth 175 miliardë dollarë në drejtimin e kundërt. Vetëm Meksika është një partner tregtar më i madh i SHBA-së.

Një kërcënim tarifor pas tjetrit

Negociatorët nga të dy vendet kishin zhvilluar bisedime deri të premten në mbrëmje në një përpjekje për të arritur një marrëveshje dhe për të shmangur tarifat e kërcënuara nga Trump.

Pas dështimit të negociatave, tarifat prej 50% për një gamë mallrash kanadeze hynë në fuqi brenda natës.

Masat ndikojnë në mallrat kanadeze me vlerë rreth 20 miliardë dollarë, ekuivalente me rreth 5% të importeve totale, duke përfshirë shkopinj hokeji, mobilje, mjaltë dhe verë.

Kanadaja premtoi tarifa reciproke “dollar për dollar”, me kryeministrin Mark Carney që tha se këto do të zbatohen nga 8 shtatori.

Masat do të përqendrohen në sektorë që përfshijnë çelikun, produktet e qumështit, pajisjet bujqësore dhe pajisjet elektrike, tha Carney.

“Ky është një përgjigje e fokusuar për të mbrojtur industritë tona dhe për t’u lejuar atyre të konkurrojnë me produktet amerikane në tregun kanadez”, tha ai.

”Keystone XL” në qendër të mosmarrëveshjes

Më parë këtë muaj, Trump fillimisht kishte pezulluar tarifat prej 50% që tani kanë hyrë në fuqi në një përpjekje për të siguruar një marrëveshje mbi projektin e tubacionit të naftës ”Keystone XL”.

Republikani ka kërkuar prej kohësh të ringjallë projektin ndërkufitar pavarësisht shqetësimeve nga aktivistët mjedisorë. Megjithatë, tubacioni kohët e fundit është larguar nga diskutimet.

Trump ka ndryshuar vazhdimisht qëndrimin e tij gjatë mosmarrëveshjes tregtare SHBA-Kanada.

Pasi vendosi tarifa prej 25% për pothuajse të gjitha mallrat kanadeze vitin e kaluar, duke përmendur atë që ai e quajti veprim të pamjaftueshëm nga Kanadaja për të luftuar kontrabandën e drogës, Trump në një moment kërcënoi me tarifa prej 100%.

Ai ka përdorur gjithashtu kërcënime me tarifa për të kërkuar lëshime në një mosmarrëveshje të veçantë mbi një urë ndërkufitare pranë Detroitit./ a.jor.