Komisioni Evropian: Takimi Vuçiç–Von der Leyen në Nju-Jork ishte spontan, jo i planifikuar

Komisioni Evropian konfirmoi sot se takimi i presidentit të Serbisë, Aleksandar Vuçiç, me presidenten e Komisionit Evropian, Ursula von der Leyen, në Nju-Jork ishte spontan dhe nuk ishte planifikuar paraprakisht.

Zëdhënësja e Komisionit Evropian, Ariana Podesta, tha në një konferencë për shtyp se von der Leyen dhe Vuçiç u takuan rastësisht dhe shkurtimisht në margjinat e Asamblesë së Përgjithshme të Kombeve të Bashkuara. “Ishte një takim spontan, një nga rastet shumë të rralla të tilla, kështu që mendoj se nuk kemi asgjë për të shtuar përveç asaj që tashmë thashë. Takimi ishte shumë i shkurtër, spontan dhe asgjë më shumë se kaq”, tha Podesta, sipas transmetimit të Radio Evropa e Lirë.

Vuçiç publikoi në llogarinë e tij në Instagram një foto ku shtrëngon duart me von der Leyen-in dhe shkroi se gjatë bisedës së shkurtër i shprehu asaj “mirënjohje të sinqertë për gjithçka që kishte bërë për Serbinë në vitet e kaluara”.

Von der Leyen publikoi në rrjetet sociale një sërë takimesh që kishte zhvilluar në margjinat e Asamblesë së Përgjithshme të OKB-së, e cila po mbahet këtë javë në Nju-Jork, por nuk publikoi asnjë postim që i referohej bisedës me presidentin serb.

Javën e ardhshme von der Leyen do të udhëtojë në rajon në kuadër të turneut të saj tradicional vjetor në Ballkanin Perëndimor, por këtë herë nuk do ta vizitojë Serbinë dhe Bosnjë-Hercegovinën. Shpjegimi zyrtar i Komisionit Evropian është se në të dyja vendet po zhvillohen fushata parazgjedhore, ndërsa jozyrtarisht konfirmohet se ndikim të rëndësishëm në vendimin e von der Leyen për të mos vizituar Serbinë pati edhe reagimi i autoriteteve ndaj vdekjes së kriminelit të dënuar të luftës Ratko Mladiç, si dhe varrimi i tij me nderime shtetërore në Beograd.

Burimi: Danas