Rubio pas takimit me Lavrovin në Nju-Jork: SHBA-ja synon të forcojë bashkëpunimin strategjik me Serbinë

Sekretari amerikan i Shtetit Marko Rubio deklaroi sot se SHBA-ja synon të forcojë bashkëpunimin strategjik me Serbinë, pas takimit që zhvilloi me ministrin e Jashtëm rus Sergej Lavrov në Nju-Jork, në kuadër të javës së Asamblesë së Përgjithshme të OKB-së.

“Kemi ndërmarrë tashmë hapa drejt bashkëpunimit më të ngushtë. Disa përfaqësues të Departamentit të Shtetit dhe agjencive të tjera kanë udhëtuar në Serbi, dhe shpresoj se do të kem edhe unë atë mundësi”, tha Rubio në konferencë për shtyp, duke iu përgjigjur pyetjes për marrëdhëniet SHBA–Serbi. Konferenca u transmetua nga agjencia ruse Tass.

“Serbia është e përfshirë në një sërë çështjesh potencialisht problematike dhe të ndjeshme që prekin interesat ndërkombëtare, por ky është një partneritet strategjik që duam dhe synojmë ta zhvillojmë, ndërsa zgjidhim një sërë çështjesh që i prekin drejtpërdrejt ata”, shtoi kreu i diplomacisë amerikane.

Deklaratat e Rubios vijnë në një moment kur Uashingtoni po e rishikon qasjen e tij ndaj Ballkanit Perëndimor, me synimin e deklaruar për të thelluar kanalet e bashkëpunimit ekonomik dhe politik me Beogradin, pavarësisht lidhjeve tradicionale të Serbisë me Moskën.

Burimi: Danas