Komisioni i Jashtëm mblidhet për situatën në Maqedoni

Në kohën kur data e zgjedhjeve në Maqedoni po afrohet, por kur situata politike është tensionuar ndjeshëm pas dekretit të amnistisë të lëshuar nga Presidentit Ivanov, Komisioni i Politikës së Jashtme në Kuvend ka thirrur në një raportim urgjent përfaqësues të Ministrisë së Jashtme lidhur me situatën politike në Maqedoni dhe rolin e faktorit shqiptarë.

Sipas zv.ministres Odeta Barbullushi, ajo që ka sjellë përshkallëzimin e destabilitet politik, ndër të tjera është edhe e amistia e Presidentit të Maqedonisë.

“Falja ose Amnistia e Presidentit, në fakt, për ta thënë objektivisht ka minuar të gjithë, ose numrin më të madh të objektivave që synonte të arrinte marrëveshja e Perzhinos, pikërisht sepse fal të gjithë ato persona që u ka dalë emri nga përgjimet si persona të akuzuar dhe të përfshirë në afera të ndryshme korruptive”, tha zv.ministrja Barbullushi.

Më pas, mbledhja ka vijuar për rreth 1 orë me dyer të mbyllura, ku burime për Top Channel bëjnë të ditur se diskutimi kryesor  është fokusuar tek roli i faktorit shqiptarë në Maqedoni,  ku është raportuar se BDI është pro zhvillimit të zgjedhjeve më 5 qershor, ndërsa PDSH nuk ka ende një qëndrim publik mbi këtë çështje.

Po ashtu, është bërë dhe një tablo e partive të vogla, të cilat kanë dalë në skenën politike gjatë kohëve të fundit dhe rëndësinë që ato mund të marrin në politikën maqedonase.

Nga ana e deputetëve është kërkuar qe Ministria e Jashtme të mbajë kontakte të vazhdueshme lidhur me situatën, por duke shmangur në çdo mënyrë ndërhyrjet në politikën e brendshme të Maqedonisë.