Komisioni për të Drejtat e Njeriut miraton ndryshimet ligjore për pasuritë e sekuestruara dhe ndërtimet pa leje! Qefalia: V

Komisioni për të Drejtat e Njeriut miraton ndryshimet ligjore për pasuritë e sekuestruara dhe ndërtimet pa leje

Komisioni për të Drejtat e Njeriut dhe Mjetet e Informimit Publik, nën drejtimin e kryetares Jorida Tabaku, ka shqyrtuar dhe miratuar në parim, nen për nen dhe në tërësi, dy projektligje të rëndësishme që lidhen me menaxhimin e pasurive të sekuestruara dhe ndërtimeve pa leje.

Projektligji i parë i shqyrtuar ishte ai “Për disa ndryshime dhe shtesa në ligjin nr. 34/2019, ‘Për administrimin e pasurive të sekuestruara e të konfiskuara’”. Nisma u prezantua para anëtarëve të komisionit nga Zëvendësministri i Brendshëm, Xhemal Qefalia.

Sipas zëvendësministrit, ky ndryshim ligjor synon të zgjerojë fushën e veprimit të agjencisë përgjegjëse, duke i mundësuar asaj menaxhimin jo vetëm të pasurive të bllokuara nga organet e drejtësisë, por edhe të atyre të sekuestruara me vendime të pushtetit vendor apo institucioneve të tjera administrative.

Projektligji u relatua nga deputetja Etleva Budini, e cila vlerësoi rëndësinë e kësaj nisme dhe u kërkoi anëtarëve votën pro. Pas pyetjeve dhe diskutimeve, dokumenti mori miratimin e plotë të komisionit.

Qartësimi i procedurave për ndërtimet pa leje

Më tej, komisioni vijoi me shqyrtimin e nismës tjetër ligjore për ndryshimet në ligjin nr. 66/2023, që lidhet me administrimin e objekteve të konfiskuara si ndërtime pa leje, me qëllim përdorimin e tyre për interes publik, strehim social apo zbutjen e pasojave sociale.

Gjatë prezantimit të këtij projektligji, Zëvendësministri Qefalia nënvizoi se ndryshimet sjellin një kuadër më të qartë procedural dhe më shumë siguri juridike.

“Projektligji sjell një qendër të vetme përgjegjësie, duke i besuar agjencisë administrimin e objekteve me status të konfiskuar. Së dyti, vendimmarrje profesionale dhe transparente. Së treti, financim të qëndrueshëm përmes fondit të posaçëm që mundëson vënien në përdorim të objektit dhe së fundi mbrojtje efektive për pronarët e truallit apo personave të tretë për paqartësitë e krijuara në konflikte gjyqësore,” u shpreh Qefalia.

Pas relatimit nga deputetja Budini dhe diskutimeve përkatëse, edhe ky projektligj u miratua në tërësi nga Komisioni për të Drejtat e Njeriut.