Kompania Meta arrin marrëveshje me një tjetër adoleshente, 18-vjeçarja tërheq akuzat për varësinë nga Instagram dhe Facebook

Meta, kompania mëmë e Instagram dhe Facebook, ka arritur një marrëveshje jashtë gjykatës me një tjetër adoleshente, e cila e akuzonte kompaninë se platformat e saj nxisnin varësinë dhe kishin ndikuar negativisht në shëndetin e saj mendor dhe në çrregullimet e të ngrënit.

E reja 18-vjeçare, e identifikuar me inicialet KDB, ka tërhequr akuzat pas marrëveshjes, kushtet e së cilës nuk janë bërë publike. Kjo është marrëveshja e dytë e Metës brenda një jave, pas zgjidhjes së çështjes me një tjetër paditëse 16-vjeçare.Si pasojë, procesi gjyqësor që pritet të nisë në Los Angeles do të vijojë vetëm kundër Snap Inc., kompanisë mëmë të Snapchat.

Dy adoleshentet pretendonin se kishin nisur përdorimin e platformave sociale që në moshë shumë të vogël dhe se funksione si luajtja automatike e videove dhe lëvizja e pafundme në ekran kishin nxitur sjellje kompulsive dhe varësi.

Kompanitë e teknologjisë i kanë mohuar akuzat, duke deklaruar se platformat nuk janë krijuar për të shkaktuar varësi dhe se kanë ndërmarrë masa për mbrojtjen e përdoruesve të mitur.

Çështja është pjesë e një vale padish në SHBA kundër kompanive të mëdha të rrjeteve sociale, të cilat akuzohen për ndikimin e platformave të tyre në shëndetin mendor të të rinjve.