Kontrolli i armëve, kaos në Kongresin amerikan

Pamje të pazakonta kaosi erdhën të mërkurën nga Dhoma e Ulët e Kongresit amerikan. Një grup demokratësh organizuan një protest brenda sallës kundër refuzimit të republikanëve për të hedhur në votë një rezolutë që parashikon kufizimin e blerjeve të armëve.

Ligjvënësit thanë se po përpiqeshin të bindnin kryetarin e saj Paul Ryan, udhëheqës i shumicës republikane, që të anulojë pushimin një-javor të planifikuar për javën e ardhshme. Protesta ndodhi pas masakrës së Orlandos, më vdekjeprurësja në historinë moderne të SHBA-së që i kushtoi jetën 49 personave.

Demokratët bënë thirrje për zhvillimin e një debati dhe votimi mbi masat për të zgjeruar kontrollet ndaj personave që blejnë armë si dhe për të mos lejuar blerjen e armëve nga ata që dyshohen si terroristë. Disa prej tyre u ulën në dysheme, duke i lënë të habitur republikanët me këtë taktikë që është e zakonshme për protestat në rrugë, por jo në Kongres.

Protesta drejtohej nga ikona e të drejtave civile, John Lewis nga Georgia, i cili tha se “në 12 vitet e fundit krimet me armë morën më shumë jetë amerikanësh sesa SIDA dhe mbidozat e lëndëve narkotike së bashku”.

Ligjvënësi republikan që kryesonte seancën, Ted Poe i Teksasit, deklaroi pezullimin e saj dhe dha urdhër të ndërpritej mbulimi televiziv, por demokratët vazhduan të përcillnin imazhet përmes telefonëve celularë. Pasi protesa hyri në orën e saj të dhjetë, kryetari i Dhomës së Përfaqësuesëve, Paul Ryan u përpoq të rivendoste kontrollin, por pa sukses.

Më pas, u largua mes thirrjeve të demokratëve “T’ju vijë turp”.
Ata filluan të këndonin “We shall overcome” dhe lexuan emrat e viktimave të sulmeve me armë zjarri. Disa përfaqësues demokratë kishin marrë me vete jastëkë dhe batanije të cilat i shtruan në dysheme. Jashtë Kongresit disa qindra aktivistë për kufizimin e armëve të zjarrit u mblodhën për të mbështetur demokratët, duke bërtitur “qëndroni atje” apo “bëni punën tuaj”.