Kriza e emigrantëve, liderët e BE-së bien dakord për shpërndarjen e tyre

Kriza e emigrantëve në detin Mesdhe, në sfondin e kërcënimeve të Italisë për reagim të ashpër të saj, në rast se nuk arrihet një marrëveshje, duket se po gjen zgjidhje.

Gjatë samitit të Brukselit, i cili nisi të enjten, liderët e BE-së ranë dakord për të përshpejtuar zhvendosjen e mijëra emigrantëve të ardhur në Itali dhe në Greqi. Kreu i samitit, Donald Tusk tha se 40 mijë emigrantë do të shpërndahen në shtete të tjera të BE-së gjatë dy viteve të ardhshme.

Më parë, Tusk u bëri thirrje vendeve anëtare të BE-së për të ndarë barrën e emigrantëve, të cilët kanë kaluar Mesdheun duke kërkuar një jetë më të mirë në Europë, por ai tha se nuk u arrit një marrëveshje për vendosjen e kuotave të detyrueshme. “Ne nuk kemi nevojë për deklarata boshe, por për vepra konkrete dhe numra”, tha ai.

Të paktën 153 mijë emigrantë janë përpjekur për të hyrë në shtetet e BE-së vetëm gjatë këtij viti, një rritje prej 149% krahasuar me një vit më parë, sipas “Frontex”.

Ngërçi i krijuar, sidomos muajt e fundit, i ka vënë në vështirësi të mëdha autoritetet e Italisë, Greqisë dhe Maltës, tre vendet e përballura me valën e parë të klandestinëve të mbërritur nga Afrika Veriore.

Kryeministri italian Matteo Renzi ka kaluar në paralajmërime të qarta se, po nuk u prodhua një marrëveshje e drejtë në Bruksel, atëherë vendi i tij do të kalojë në planin B, që është lëshimi i vizave të përkohshme, që do t’u lejojnë emigrantëve të udhëtojnë lirshëm, falë rregullave të zonës “Shengen” në vende të tjera europiane përtej Italisë.