Kriza e energjisë, Meloni kërkon lehtësi nga rregullat e BE-së

Kryeministrja italiane Giorgia Meloni i kërkon Brukselit më shumë hapësirë për të përballuar rritjen e çmimeve të energjisë. Në një letër drejtuar Presidentes së Komisionit Evropian, Ursula von der Leyen, Meloni argumenton se rregullat fiskale të BE-së po kufizojnë mundësinë e qeverive për të ndihmuar familjet dhe bizneset.

Sipas Melonit, kriza e zgjatur në Lindjen e Mesme ka shtrënguar ndjeshëm tregjet evropiane të energjisë. Çmimi i naftës është rritur me rreth 80 për qind, ndërsa gazi deri në 156 për qind, duke shtuar presionin mbi ekonominë dhe shpenzimet e familjeve.

Meloni kërkon që një pjesë e të ardhurave shtesë nga taksat, të krijuara automatikisht nga rritja e çmimeve dhe inflacioni, të mund të përdoren për masa të përkohshme dhe të targetuara për uljen e kostove të energjisë.

Sipas saj, problemi është se rregullat e reja të BE-së vendosin kufij për rritjen e shpenzimeve publike, edhe kur inflacioni rrit automatikisht disa prej tyre, si pensionet dhe detyrimet e tjera të lidhura me çmimet.

Italia, e cila ka një nga nivelet më të larta të borxhit publik në raport me ekonominë në BE, po kërkon që kjo çështje të diskutohet në takimin e ministrave të Financave të BE-së më 9 tetor. Meloni thekson se Roma mbështet objektivin e qëndrueshmërisë së borxhit, por kërkon më shumë fleksibilitet për të përballuar krizën energjetike.