Kryeministri i përgjigjet Gjuriqit: “Trepçës” ia kemi dhënë drejtimin e duhur
Reagimi i kryeministrit të Kosovës erdhi pak minuta pasi shefi i Zyrës për Kosovën në Serbi, Marko Gjuriq, ka reaguar për Ligjin e “Trepçës”, duke thënë se Kosova ka shkelur Rezolutën 1244 dhe se kërkojnë takim urgjent me Këshillin e Sigurimit të OKB-së.
Kryeministri i Kosovës, Isa Mustafa, ka thënë se Kosova dje ka kaluar një ditë të rëndësishme për fatin e “Trepçës” dhe ardhmërisë së saj.
“Aprovuam një ndër ligjet më të mira në Kuvendin e Kosovës, Ligjin e “Trepçës”. “Trepça” na bashkoi të gjithëve, ata që e përkrahën, por edhe ata që nuk e përkrahën ligjin”, shkruan Mustafa.
Ai gjithashtu ka përmendur edhe kontributin e dhënë nga deputetët e AAK-së dhe të “Nismës”.
“Aty ishin edhe deputetët e Listës Serbe, të cilët shfrytëzuan të drejtën e tyre të prezantojnë qëndrimet për Ligjin e një procesi demokratik”, ka shkruar kryeministri.
Megjithatë, ai ka shtuar se akoma nuk janë përfunduar të gjitha punët e shtetndërtimit, prandaj Kosovës i nevojitet një bashkëpunim dhe unitet më i lartë për tema që janë në interes të të gjithëve.
“E përgëzoj Kuvendin, i cili 17 vjet pas çlirimit arriti, që së bashku me Qeverinë, t’i japë drejtimin e duhur zhvillimit të “Trepçës””, ka thënë Mustafa
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.