Kupa e Shqipërisë: Luhet edhe për 50 milionë lekë, finalen e gjykon Enea Jorgji

Finalet luhen për t’u fituar dhe ka shumë arsye pse dy skuadrat që përballen mes tyre japin gjithçka në fushë për të festuar në fund. Dinamo dhe Egnatia ndeshen sot në aktin final të Kupës së Shqipërisë – që transmetohet në RTSH, – me pretendimin e qartë për ta fituar sfidën.

Një trofe është gjithmonë një trofe, aq më tepër kur mund të shpëtojë një sezon, si në rastin e këtyre dy skuadrave. Por nuk janë vetëm prestigji dhe krenaria në lojë. Një arsye më shumë për të fituar finalen e sotme të Kupës së Shqipërisë në “Air Albania” është edhe shpërblimi i vëndosur për trofeun, 50 milionë lekë.

Finalja e sotme do të gjykohet nga arbitri ndërkombëtar Enea Jorgji. Ai është i përzgjedhuri i FSHF-së për këtë sfidë të rëndësishme. Ndihmës të Jorgjit do të jenë Denis Rexha dhe Ridiger Çokaj.

Një tjetër arbitër me stemën e FIFA-s, Juxhin Xhaja, do të jetë në dhomën e VAR-it, bashkë me Kreshnik Cjapin.