Kuvend, diskutohet ligji për arsimin e lartë. Berisha: Atentat universiteteve
Në seancën parlamentare të kësaj të enjteje kanë nisur diskutimet për projekligjin për arsimin e lartë.
Në fjalën e tij, kryetari i grupit parlamentar të PD, Edi Paloka ka akuzuar mazhorancën për hartimin e një ligji në mënyrë të njëanshme.
“Nuk ka pasur asnjë konsultim për këtë projektligj”, ka deklaruar Paloka.
Por kreu i grupit të PS, Gramoz Ruçi është përgjigjur duke thënë se, vetë opozita zgjodhi të mos jepte asnjë kontribut për këtë ligj.
“Nuk është përgjegjësi e mazhorancës, që deputetët e opozitës të bëhen bllokues dhe jo kontribues. Ata kishin gjithë kohën e domosdoshme për 4 muaj rresht që ta shqyrtonin”, ka thënë Ruçi.
Sipas tij, komisioni i arsimit ka bërë një punë maratonë me seanca dëgjimore, me të gjitha grupet e interesit.
Ruçi ka shprehur më tej gatishmërinë e mazhorancës për ta diskutuar me opozitën ligjin, por jo për të vajtur me bisedime shterpë.
Pak më vonë, duke marrë fjalën në seancë, ish-kryeministri Sali Berisha ka kritikuar ashpër ligjin për arsimin e lartë.
Berisha është shprehur se, futja në rendin e ditës e këtij projektligji është jashtë çdo kriteri.
“Ky projektligj është një atentat ndaj universiteteve publike, është fund e krye antievropian dhe shtetëzon universitetet private”, ka deklaruar Berisha.
