KUVENDI I MALIT TË ZI MIRATON NDRYSHIMET KUSHTETUESE PËR VERIFIKIMIN E INTEGRITETIT

_{Foto: Kuvendi i Malit të Zi / Skupština Crne Gore}

Kuvendi i Malit të Zi ka miratuar me 56 vota pro ndryshimet kushtetuese që parashikojnë verifikimin e integritetit të kandidatëve për kryeministër të mandatuar dhe anëtarë të Qeverisë.

Gjithashtu, u miratua amendamenti që përcakton se ligji i posaçëm për këtë çështje do të miratohet me shumicë prej dy të tretash të të gjithë deputetëve.

Sipas ndryshimeve, personat që nuk plotësojnë kushtet ligjore të integritetit nuk mund të propozohen për kryeministër të mandatuar ose ministra.

Nisma synon forcimin e transparencës, përgjegjësisë dhe luftës kundër korrupsionit.

Ndryshimet u mbështetën nga shumica parlamentare, deputetët e pavarur dhe përfaqësuesit e partive të pakicave, ndërsa PDS-ja dhe disa përfaqësues të tjerë shprehën rezerva, duke vlerësuar se mekanizmi mund të ndikojë në vullnetin zgjedhor të qytetarëve.

Miratimi i ndryshimeve konsiderohet një hap në kuadër të reformave që Mali i Zi duhet të përmbushë në rrugën drejt Bashkimit Evropian, veçanërisht për mbylljen e kapitullit 23, që lidhet me gjyqësorin dhe të drejtat themelore.

Ndërkohë, kandidatët për anëtarë të Këshillit Gjyqësor, Darko Hajdukoviq dhe Klaudija Pejoviq, nuk morën mbështetjen e nevojshme të deputetëve.