Kuvendi mblidhet sot në seancë plenare, në rend dite BQK-ja, RTK-ja dhe ligji kundër pastrimit të parave

Kuvendi i Kosovës mblidhet sot, të enjten, në seancë plenare, e cila është paraparë të nisë në orën 10:00, siç ka njoftuar Drejtoria për Media dhe Marrëdhënie me Publikun e Kuvendit, raporton Gazeta Express. Seanca u caktua nga Kryesia e Kuvendit në mbledhjen e mbajtur të hënën.

Në rendin e ditës janë gjithsej shtatë pika. Pas miratimit të procesverbaleve nga seancat e mëparshme, deklarimeve jashtë rendit të ditës dhe pyetjeve parlamentare, deputetët pritet të përzgjedhin dy anëtarë joekzekutivë të Bordit të Bankës Qendrore të Republikës së Kosovës.

Një pikë tjetër e rëndësishme, sipas raportimit të KosovaPress, është formimi i Komisionit Ad-Hoc për përzgjedhjen e kandidatëve për Bordin e Radiotelevizionit të Kosovës: dy anëtarë nga komuniteti shqiptar, një anëtar nga komuniteti serb dhe një anëtar nga komunitetet joshumicë. Në rend dite është përfshirë edhe propozimi i Grupit Parlamentar të Listës Serbe për emërimin e deputetëve të saj në komisionet parlamentare.

Pika përmbyllëse e seancës është shqyrtimi i dytë i Projektligjit nr. 11/L-017 për ndryshimin dhe plotësimin e Ligjit nr. 05/L-096 për Parandalimin e Pastrimit të Parave dhe Luftimin e Financimit të Terrorizmit, një nga nismat ligjore që lidhet me përafrimin e legjislacionit financiar të vendit me standardet ndërkombëtare.