Lëvizja e beftë e Adriatik Llallës

Një muaj pas shkrirjes së njësisë antikorrupsion, kryeprokurori Adriatik Llalla, me një lëvizje të papritur, vendos shtimin e numrit të prokurorëve në strukturën e ngritur posaçërisht për hetimin e zyrtarëve të lartë.

Në një mbledhje të Këshillit të Prokurorisë, zhvilluar të premten e javës së shkuar, u vendos transferimi i 8 prokurorëve në njësinë antikorrupsion në Prokurorinë e Krimeve të Rënda.

Mes prokurorëve që pritet të transferohen pranë kësaj njësie, është edhe Ramadan Troci, prokurori që arrestoi ish-Guvernatorin Adrian Fullani dhe ish-kryetarin e Bashkisë së Vlorës, Shpëtim Gjika.

Kjo lëvizje e Llallës, konsiderohet e beftë jo vetëm se shtimi i prokurorëve në njësinë antikorrupsion bëhet në kulmin e debatit për Byronë e Hetimit, por edhe për faktin se vetëm një muaj më parë, ai largoi 4 prokurorë nga kjo njësi.

Argumenti i përdorur nga kryeprokurori asokohe, kishte të bënte me numrin e ulët të referimeve nga policia për rastet e korrupsionit në radhët e zyrtarëve të lartë.

Por pavarësisht këtij qëndrimi, të shprehur edhe në një njoftim zyrtar të Prokurorisë së Përgjithshme më 5 janar të këtij viti, kryeprokurori i ka propozuar Presidentit të Republikës, dekretimin e 8 prokurorëve.

Dy prej tyre aktualisht janë në Prokurorinë e Tiranës, ndërsa pjesa tjetër vijnë nga prokurorët e rretheve, ku tre prej tyre janë në prokurorinë e Vlorës.

Drejtuesi i kësaj prokurorie, Ramadan Troci, shefi i njësisë Task Forcë, Klodian Braho dhe ish-drejtuesi i njësisë Task Forcë në Prokurorinë e Vlorës, Maksim Sota, janë përzgjedhur për të qenë pjesë e njësisë antikorrupsion në Prokurorinë e Krimeve të Rënda.

Në listën e prokurorëve të propozuar për dekret, është edhe drejtuesi i Prokurorisë së Lushnjës, Arenc Çela.

Trupës së prokurorëve antikorrupsion, do t’i bashkohen edhe Pranvera Hoxha e komanduar pak kohë më parë në prokurorinë e Tiranës dhe kolegia e saj Sonila Domi, e cila arrestoi dhe më pas pushoi çështjen ndaj ish-kreut të Interpol Tirana, Artan Bajraktari, raporton Mapo.

Dy prokurorët e tjerë të propozuar për njësinë antikorrupsion, janë: Ornela Rrumbullaku dhe Marjola Llaci, prokurore në Fier.