Ligji i ri frenon kompanitë e huaja të nxjerrin fitimet jashtë

Shqipëria po përshtat legjislacionin me rregullat ndërkombëtare të OECD dhe BE-së për tatimin minimal global ndaj korporatave shumëkombëshe.

Në thelb, drafti synon të frenojë praktikat kur kompani të mëdha zhvendosin fitimet në vende me taksa shumë të ulëta për të paguar më pak tatime.

Sipas draftit, vendet do të kenë të drejtë të kërkojnë pagesë shtesë tatimi kur të ardhurat tatohen nën nivelin minimal të përcaktuar.

Dokumenti parashikon rregulla për interesat, honoraret, shërbimet dhe pagesat mes kompanive të lidhura, për të shmangur transferimin artificial të fitimeve.

“Kjo është pjesë e reformës globale të njohur si ‘Pillar Tëo’. Synimi është që korporatat shumëkombëshe të mos shmangin taksat duke zhvendosur fitimet në juridiksione me tatime shumë të ulëta. Pra, fitimi tatohet aty ku krijohet aktiviteti ekonomik real. Kjo rrit transparencën fiskale dhe ul hapësirat për evazion ndërkombëtar.”

Drafti sqaron gjithashtu se rregullat synojnë kryesisht grupet e mëdha multinacionale dhe jo bizneset e vogla vendase.

Në dokument përmenden pragje të larta financiare dhe marrëveshje ndërkombëtare për shmangien e tatimit të dyfishtë.

“Për Shqipërinë kjo është një përafrim me standardet europiane të tatimit. Kompanitë shumëkombëshe do të duhet të paguajnë një nivel minimal tatimi, pavarësisht ku i deklarojnë fitimet.”

Marrëveshja pritet të ndikojë kryesisht kompanitë shumëkombëshe që operojnë në disa shtete, ndërsa autoritetet e shohin si hap drejt modernizimit të sistemit fiskal shqiptar.

Tv Klan

/tvklan.al