Lituania i bashkohet zonës euro

 Lituania do t’i bashkohet zonës euro në fillim të vitit 2015, pasi mori sot miratimin e shteteve anëtare, pas Komisionit dhe Parlamentit Evropian. Ajo do të bëhet gjithashtu anëtarja e 19-të e Bashkimit Monetar dhe vendi i tretë balltik që miraton monedhën unike, pas një procesi të nisur disa vite më parë dhe kushtëzuar në respektim të kritereve ekonomike. “Hyrja e Lituanisë në euro nuk është e rëndësishme vetëm për këtë vend partner, por gjithashtu dhe një element kyç për gjithë zonën euro”, konfirmoi ministri italian i Cështjeve Evropiane, Sandro Gozi, vendi i të cilit drejton Bashkimin Evropian deri në fund të vitit 2014. ”Anëtarësimi në euro do të japë një numër të madh përfitimesh për qytetarët dhe ndërmarrjet lituaneze”, theksoi komisioneri evropian i ngarkur me Cështjet Ekonomike, Jyrki Katainen duke cituar veçanërisht eliminimin e rreziqeve lidhur me përqindjen e këmbimit. “Përpjekjet tona i kanë dhënë frytet, zona euro na ka hapur portën tashmë”, deklaroi kryeministri lituanez, Algirdas Butkevicius duke e parë këtë etapë si një siguri e madhe për vendin.