Lojtari amerikan i kriketit përjashtohet për tetë vjet nga të gjitha aktivitetet

Lojtari amerikan i kriketit, Bodugum Akhilesh Reddy, është pezulluar për tetë vjet nga të gjitha aktivitetet e kriketit, pasi u shpall fajtor për shkelje të rënda të rregullave kundër korrupsionit nga Tribunali Anti-Korrupsion i Këshillit Ndërkombëtar të Kriketit (ICC).

Reddy, i cili ishte pezulluar përkohësisht që nga nëntori, u dënua për disa shkelje, përfshirë trukimin e ndeshjeve, tentativën për të rekrutuar persona të tjerë për manipulimin e rezultateve, si dhe shkatërrimin e provave që lidhen me hetimin.

Sipas ICC-së, akuzat lidhen me turneun Abu Dhabi T10 të zhvilluar në Emiratet e Bashkuara Arabe gjatë vitit 2025.

26-vjeçari ka zhvilluar katër ndeshje ndërkombëtare në formatin T20 me përfaqësuesen e Shteteve të Bashkuara, duke regjistruar një wicket. Ai debutoi me ekipin kombëtar në Kupën T20 të Amerikës së Veriut, në ndeshjen kundër Ishujve Kajman.