Mali i Zi dhe BE-ja të hënën në Luksemburg për mbylljen e dy kapitujve të tjerë negociues
Në fokus të konferencës së 29-të ndërqeveritare do të jenë kapitulli 18 (statistika) dhe kapitulli 19 (politika sociale dhe punësimi).
Mali i Zi dhe Bashkimi Evropian do të mbajnë të hënën, më 12 tetor, në Luksemburg konferencën e 29-të ndërqeveritare, në të cilën është planifikuar mbyllja e përkohshme e negociatave në dy kapituj të tjerë. Lajmi njoftohet në faqen e Këshillit të BE-së, siç raporton portali malazez Vijesti.
Në fokus të konferencës do të jenë kapitulli 18, që ka të bëjë me statistikën, dhe kapitulli 19, që përfshin politikën sociale dhe punësimin — dy fusha që vlerësohen si thelbësore për përafrimin e mëtejshëm të Podgoricës me standardet evropiane.
Mali i Zi deri tani ka hapur të 33 kapitujt negociues, nga të cilët 18 janë mbyllur përkohësisht, duke e mbajtur vendin ndër kandidatët më të avancuar në procesin e zgjerimit të BE-së.
Në konferencën e mëparshme ndërqeveritare, të mbajtur më 14 korrik të këtij viti, u mbyllën përkohësisht kapitulli 8, për konkurrencën, dhe kapitulli 29, për bashkimin doganor. Mbyllja e pritshme e dy kapitujve të tjerë të hënën pritet t’i japë një shtysë të re procesit të negociatave.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.