Mali i Zi krijon rezerva shtetërore mallrash: në krizë, kufizim çmimesh dhe kontroll më i rreptë

Qeveria e Malit të Zi i ka hapur rrugë krijimit të rezervave shtetërore të mallrave, pasi në seancën e djeshme miratoi Dekretin për mënyrën e formimit, ruajtjes dhe përdorimit të tyre, siç njofton RTCG-ja. Dekreti është përgatitur nga Ministria e Zhvillimit Ekonomik dhe, sipas qeverisë, krijon një kornizë sistematike dhe të parashikueshme për formimin dhe menaxhimin e rezervave.

Sipas dekretit, për produktet energjetike, veçanërisht derivatet e naftës, të dhënat do të sigurohen nga Administrata për Hidrokarburet dhe nga Monstati, instituti shtetëror i statistikave. Për produktet bujqësore dhe ushqimore do të përcaktohen qartë llojet dhe sasitë e mallrave, si dhe mënyra e kontrollit të cilësisë, ndërsa të dhënat për barnat, përfshirë insulinën, do t’i sigurojë Ministria e Shëndetësisë në bashkëpunim me institucionin shëndetësor “Montefarm”.

Një pjesë e rëndësishme e rregullores është plani i masave emergjente, i cili miratohet me propozim të ministrisë kompetente për ekonominë. Në situata krize, shteti do të mund të vendosë masa si kufizimi i çmimeve të produkteve bazë dhe shitja e drejtpërdrejtë e mallrave qytetarëve me çmime më të favorshme, me qëllim mbrojtjen e standardit të jetesës.

Dekreti përcakton edhe kontroll të rregullt të gjendjes minimale të rezervave, si kusht për reagim në kohë kur ai është i nevojshëm. RTCG-ja rikujton se Kuvendi i Malit të Zi miratoi në qershor Ligjin për ndërhyrjet në rezervat e mallrave, mbi bazën e të cilit u hartua edhe ky dekret.