Rreth 9 mijë nxënës në Prishtinë do t’u nënshtrohen kontrolleve sistematike mjekësore

Drejtoria e Shëndetësisë e Kryeqytetit ka nisur kontrollet sistematike mjekësore në 47 shkolla të Prishtinës, ku do të përfshihen rreth 9 mijë nxënës, siç njofton Telegrafi duke iu referuar njoftimit të Kryeqytetit.

Sipas njoftimit, vizitat mjekësore po realizohen në bashkëpunim me ekipet e kujdesit parësor shëndetësor, me qëllim përcjelljen e gjendjes shëndetësore të nxënësve dhe identifikimin me kohë të shqetësimeve të mundshme.

“Bashkë me ekipet e kujdesit parësor shëndetësor, po përcjellim gjendjen e nxënësve dhe po identifikojmë me kohë çdo shqetësim të mundshëm”, thuhet në njoftimin e Kryeqytetit, të cilin e përcjell Telegrafi.

Kontrollet sistematike synojnë të kontribuojnë në identifikimin e hershëm të problemeve të mundshme shëndetësore dhe në kujdesin për shëndetin e nxënësve të kryeqytetit.