Maqedonia e Veriut dhe Bullgaria nënshkruajnë plan trevjeçar bashkëpunimi në shëndetësi

Ministri i Shëndetësisë i Maqedonisë së Veriut, Sasho Klekovski, dhe homologia e tij bullgare, Katja Ivkova, nënshkruan sot në Sofje Planin e bashkëpunimit mes dy ministrive për periudhën 2026–2028. Me planin konfirmohet vendosmëria e dy vendeve për ta thelluar bashkëpunimin në shëndetësi dhe në shkencat mjekësore, mbi bazën e barazisë, reciprocitetit dhe interesit të ndërsjellë, siç njofton Makfax duke cituar Ministrinë e Shëndetësisë.

Sipas raportimit të Makfax, plani parashikon shkëmbim informacionesh dhe përvojash, shkëmbim specialistësh për trajnime dhe konsultime, pjesëmarrje në ngjarje shkencore e mjekësore, realizim projektesh të përbashkëta shkencore e praktike, si dhe bashkëpunim në organizimin e kurseve dhe seminareve.

Si fusha prioritare të bashkëpunimit janë përcaktuar kujdesi parësor dhe i specializuar mjekësor, trajtimi spitalor, parandalimi dhe kontrolli i sëmundjeve ngjitëse e jongjitëse, si dhe mbikëqyrja epidemiologjike, statistika mjekësore, organizimi i përgjigjes shëndetësore në gjendje të jashtëzakonshme dhe shëndetësia elektronike.

Në kuadër të vizitës në Sofje, Klekovski vizitoi edhe kompleksin spitalor universitar obstetrik-gjinekologjik “Majčin dom”, ku u njoh me punën e institucionit dhe me praktikat bashkëkohore në shëndetin e nënës dhe të fëmijës, veçanërisht në neonatologji dhe kujdesin për të porsalindurit. Në bisedat me ekipet mjekësore u shkëmbyen përvoja dhe mundësi për thellimin e bashkëpunimit, me theks te depistimi neonatal dhe zbulimi i hershëm i gjendjeve te të porsalindurit.

“Majčin dom” disponon klinikën më të madhe të neonatologjisë në Bullgari, me repart të kujdesit intensiv dhe pajisje moderne mjekësore, ndërsa në kuadër të institucionit punon edhe Laboratori Kombëtar Gjenetik, i cili kryen depistimin e të porsalindurve, përfshirë ekzaminimet metabolike dhe gjenetike.

“Nënshkrimi i Planit të bashkëpunimit përbën një hap shtesë në forcimin e marrëdhënieve të fqinjësisë së mirë dhe të bashkëpunimit institucional mes dy vendeve, me qëllim shkëmbimin e njohurive dhe praktikave të mira dhe përmirësimin e cilësisë e të disponueshmërisë së shërbimeve shëndetësore për qytetarët”, theksojnë nga Ministria e Shëndetësisë, siç transmeton Makfax.