Mario Draghi vlerësohet me Çmimin “Karli i Madh 2026”, Rama: Kënaqësi të isha pjesë e ceremonisë, vlerësim për kontributin në bashkimin e Europës

Kryeministri Edi Rama mori pjesë në ceremoninë prestigjioze të ndarjes së Çmimit “Charlemagne Prize” në Aachen të Gjermanisë, ku këtë vit u nderua ish-presidenti i Bankës Qendrore Europiane dhe ish-kryeministri italian, Mario Draghi.

Në një postim në rrjetet sociale, Rama e cilësoi pjesëmarrjen në këtë aktivitet si “kënaqësi dhe nder”, duke theksuar rëndësinë e këtij vlerësimi europian, i cili konsiderohet ndër më prestigjiozët për kontributin në bashkimin dhe të ardhmen e Europës.

Sipas kryeministrit shqiptar, Mario Draghi u vlerësua për rolin e tij të jashtëzakonshëm në mbrojtjen e stabilitetit ekonomik të Europës dhe për vizionin e tij mbi një Bashkim Europian më të fortë, më konkurrues dhe më të integruar.

“Kryeministri Edi Rama: Kënaqësi dhe nder sërish, në Aachen të Gjermanisë, si pjesë e grupit të miqve të nderit të ceremonisë prestigjioze të Charlemagne Prize, një nga vlerësimet më të rëndësishme europiane për kontributin në bashkimin dhe të ardhmen e Europës, ku sot europiani i madh Mario Draghi u vlerësua me Çmimin e Karlit të Madh 2026, në respekt të rolit të tij të jashtëzakonshëm në mbrojtjen e stabilitetit ekonomik të Europës dhe nxitjen e projektit të një Europe të Bashkuar përtej kufijve të sotëm, me një treg shumë më unik, me aftësi mbrojtëse të vetëmjaftueshme, e me fuqi prodhuese e konkurruese shumë më të madhe”, shkruan Rama.

Gjatë ceremonisë kryeministri Edi Rama shkëmbeu diskutime edhe me presidenten e KE-së Ursula von der Leyen dhe kancelarin gjerman, Friedrich Merz.

Ceremonia e zhvilluar në Aachen mblodhi liderë dhe personalitete të rëndësishme europiane. Çmimi Ndërkombëtar “Charlemagne” jepet që prej vitit 1950 për figura që kanë kontribuar në unitetin europian dhe konsiderohet një nga nderimet më të larta politike në Europë.