MAS: Nuk kemi dhënë leje për shfaqjen e filmit “Pijanecët e ajrit të egër”

Ministria e Arsimit nuk ka dhënë leje për shfaqjen e filmit “Pijanecët e ajrit të egër” të regjisorit Leonard Bombaj, i cili shkaktoi polemika tek prindërit e nxënësve të dy shkollave 9-vjeçare në qytetin e Sarandës.

Pas tensionit dhe kundërshtive të hasura nga ana e prindërve të nxënësve të dy shkollave 9-vjeçare në qytetin e Sarandës, pas transmetimit të filmit, që sipas tyre përmbantë skena seksi dhe erotike, Ministria e Arsimit ka bërë me dije se nuk ka dhënë asnjë leje zyrtare për shfaqjen e filmit.

Lidhur me ngjarjen, në qytetin e Sarandës, shkolla ka çuar nxënësit e mitur të shihnin një film me skena seksi. Nxënësit kanë lënë orën e mësimit të organizuar nga shkolla për të parë premierën. Në fakt ata ua kanë transmetuar prindërve reagimin negativ që patën pas filmit “Pijanecët e ajrit të egër”.

Filmi i shfaqur fundjavën e kaluar në qytetin bregdetar ka shkaktuar tension nga ana e prindërve të të miturve. Ata janë revoltuar për dërgimin e fëmijëve të tyre të moshave nga 12-15 vjeç në kinoteatër, për të parë filmin, që sipas tyre, ka shumë skena nudizmi deri erotikë. Ndërkaq, Ministria Arsimit po verifikohen me hollësi të gjithë ngjarjen.