Mbeturinat e Kumanovës do të depozitohen përkohësisht në Drisla: Dimitrievski u kërkon falje qytetarëve

Mbeturinat e Kumanovës, nga mbrëmja e sotme, do të transportohen dhe depozitohen përkohësisht në deponinë “Drisla” në Shkup, siç njofton Makfax. Vendimi vjen pasi qyteti u përball me një krizë depozitimi, pas bllokimit të aksesit në deponinë “Krasta” nga banorët e zonës.

Lajmin e konfirmuan ndërmarrja publike “Čistota i zelenilo” dhe kryetari i komunës së Kumanovës, Maksim Dimitrievski, sipas të njëjtit burim. Dimitrievski falënderoi për mbështetjen kryeministrin Hristijan Mickoski, kryetarin e Shkupit Orce Gjorgjievski dhe ekipin menaxhues të “Drislës”, duke theksuar se aktivitetet për sanimin e deponisë “Krasta” dhe tejkalimin e problemit të mbeturinave do të vazhdojnë.

Në një postim në Facebook, kryetari i Kumanovës u kërkoi falje bashkëqytetarëve: “Në emrin tim personal dhe në emër të ekipit menaxhues të NP ‘Čistota i zelenilo’ – Kumanovë, u kërkoj falje bashkëqytetarëve të mi, të cilët për shkak të bllokadës së deponisë sonë po përballen me një problem serioz, i cili do të tejkalohet në afatin më të shpejtë të mundshëm”.

Shtabi komunal për mbrojtje dhe shpëtim i Kumanovës, në mbledhjen e djeshme, kërkoi veprim të koordinuar të institucioneve kompetente për zhbllokimin e aksesit në deponinë “Krasta”, duke insistuar që mbeturinat e qytetit të vazhdojnë të depozitohen aty.

Ndërkaq, banorët e Pčinjë-s dhe të fshatrave përreth paralajmërojnë se do ta mbajnë bllokadën derisa të shuhet zjarri në deponi dhe të zgjidhet plotësisht problemi disa-mujor që ka prekur zonën, siç raportohet nga terreni.