Një atmosferë mbresëlënëse letrare mbushi mjediset e Shoqatës së Vllehëve në Veria, ku u organizua një event i veçantë kulturor për promovimin e librit “Nomadët e fundit”, të shkrimtarit Thanas Medi. Ky event nuk ishte vetëm një prezantim libri, por edhe një reflektim i thellë mbi qytetërimin dhe trashëgiminë e pasur vllahe, e cila vijon të mbetet e gjallë ndër shekuj.
Në këtë mbrëmje të paharrueshme morën pjesë figura të njohura të kulturës dhe studimeve vllahe, duke e bërë këtë ngjarje edhe më të rëndësishme. Një falënderim i veçantë u drejtua kryetares së shoqatës, znj. Λέμη Γατοπούλου, filologut Τάκης Γκαλαιτσης, Δημητρης Παρασχος dhe të gjithë pjesëmarrësve të tjerë që kontribuan në diskutime të vlefshme rreth librit dhe historisë vllahe.
Një qytet i pasur në traditë dhe histori
Veria u shfaq menjëherë si një qytet me një identitet të fortë kulturor, ku pastërtia, fisnikëria dhe mikpritja e banorëve binin menjëherë në sy. Pjesëmarrësit patën mundësinë të njihen me përkushtimin e komunitetit vllah për ruajtjen e historisë, zakoneve, këngëve dhe traditave të tyre. Kjo ndjenjë e thellë e respektit për të kaluarën pasqyrohet edhe në muzeun e shoqatës, një godinë madhështore trekatëshe, ku ruhet dhe ekspozohet një mënyrë unike jetese, duke dëshmuar rolin e vllehëve si mbartës të një trashëgimie shekullore.
Vllehët nuk janë vetëm barinjtë dhe nomadët e dikurshëm të maleve të Pindit, por edhe pjesë e një qytetërimi të lashtë dhe të konsoliduar, me vendbanime që datojnë që nga shekujt XIII-XIV. Arkitektura e shtëpive të tyre prej guri, veshjet tradicionale fisnike dhe lidhja e fortë me kulturën e librit dëshmojnë se ky komunitet ka mbajtur gjallë identitetin e tij në hapësirat e Ballkanit.
Një libër që bashkon një popull
Ndër diskutimet më domethënëse të mbrëmjes ishte ndikimi i librit “Nomadët e fundit”, i cili ka arritur të prekë thellësisht vllehët në Shqipëri, Rumani, Greqi dhe më gjerë. Ky libër nuk është thjesht një vepër letrare, por një rrëfim identiteti, një pasqyrë e shpirtit të një populli të shpërndarë në një hapësirë të gjerë gjeografike, nga veriu në jug të Danubit. Për shumë prej pjesëmarrësve, “Nomadët e fundit” nuk është më thjesht një libër, por është shndërruar në “Librin e Vllehëve”, një simbol i historisë dhe kulturës së tyre.
Ajo që u dëshmua qartë në këtë promovim është se kur një libër prek shpirtin e një komuniteti, ai i tejkalon kufijtë e emrit të autorit dhe bëhet pronë e vetë popullit që e ndjen si pjesë të vetes. Respekti për librin dhe për njerëzit e tij ishte një nga aspektet më prekëse të kësaj mbrëmjeje, duke treguar se kultura dhe historia vllahe jetojnë jo vetëm në faqet e historisë, por edhe në zemrat e atyre që e mbajnë gjallë këtë trashëgimi.
Një mirënjohje e veçantë për organizatorët dhe të gjithë pjesëmarrësit e kësaj mbrëmjeje frymëzuese!
Ευχαριστώ πολύ σε όλους!
