Mbretëria e Bashkuar mbështet Policinë Shqiptare me pajisje bashkëkohore

Zyra e Operacioneve Ndërkombëtare e Ministrisë së Brendshme të Mbretërisë së Bashkuar (HOIO) ka dhuruar pajisje të teknologjisë bashkëkohore për Policinë e Shtetit.

Ceremonia e dhurimit u zhvillua në ambientet e Drejtorisë së Përgjithshme të Policisë së Shtetit. Donacionet, me një vlerë totale prej rreth 200 mijë paundësh, përfshijnë pajisje moderne teknologjike që do të përdoren nga Departamenti i Policisë Kriminale, Departamenti për Kufirin dhe Migracionin, si dhe Njësia e Informacionit të Pasagjerëve. Këto pajisje synojnë forcimin e kapaciteteve operacionale dhe hetimore të strukturave policore.

Drejtori i Përgjithshëm i Policisë së Shtetit, Drejtues Madhor Skënder Hita, vlerësoi mbështetjen e partnerëve britanikë, duke theksuar se bashkëpunimi mes dy institucioneve përbën një model të konsoliduar në luftën kundër krimit të organizuar, krimit ndërkufitar dhe fenomeneve të tjera me rrezikshmëri të lartë.

“Donacione të tilla përkthehen në më shumë kapacitete parandaluese, goditëse dhe hetimore në luftën kundër krimit”, u shpreh Hita, duke nënvizuar se pajisjet e reja do të ndikojnë në rritjen e efikasitetit të analizës, kontrollit dhe hetimeve policore.

Nga ana e saj, përfaqësuesja e HOIO, Tara Moore, rikonfirmoi angazhimin e institucioneve britanike për vijimin e mbështetjes ndaj Policisë së Shtetit përmes asistencës teknike, logjistike dhe shkëmbimit të praktikave më të mira profesionale.

Në ceremoninë e dorëzimit morën pjesë edhe drejtues të lartë të Policisë së Shtetit dhe përfaqësues të strukturave përfituese, të cilët vlerësuan rëndësinë e këtij bashkëpunimi në rritjen e sigurisë publike dhe forcimin e kapaciteteve të policisë shqiptare.