Me apo pa Champions, i pashmangshëm “revolucioni” te Milani. Ja sa rrezikon secili prej drejtuesve aktualë

Pavarësisht nëse kualifikohet apo jo në Champions League, te Milani pritet një revolucion i madh. Të hënën, pak orë pas ndeshjes me Cagliarin, që do të vendosë pjesëmarrjen në kompeticionin europian, në “Casa Milan” do të hapet një kapitull i ri. Sipas planit aktual, nuk parashikohet më prania e Giorgio Furlanit, i cili pritet të largohet si CEO, dhe tashmë ka nisur kërkimi për një administrator të ri të deleguar.

Procesi po ndiqet nga Massimo Calvelli, anëtar i bordit drejtues dhe krahu i djathtë i Gerry Cardinale, i cili do të ketë detyrën të zgjedhë pasardhësin. Në listë janë disa emra, përfshirë Carnevalin e Sassuolos, por nuk përjashtohen edhe profile të huaja. Ndërkohë, Igli Tare dhe Zlatan Ibrahimovic janë në dyshim. Shqiptari rrezikon largimin pas vetëm një viti si drejtor sportiv, ndërsa Ibra, si këshilltar i pronësisë, pritet të ketë rol më të kufizuar.

Sa i përket Massimiliano Allegrit, kualifikimi në Champions do ta forconte pozicionin e tij dhe do të aktivizonte rinovimin automatik, por e ardhmja mbetet e pasigurt, edhe për shkak të mundësisë për drejtimin e kombëtares italiane dhe kërkesës për garanci në merkato. Të gjitha vendimet do të nisin pas së hënës.