“Me një dorë” te titulli, Barça shpallet kampione, nëse Real Madrid dështon ndaj Espanyol

Spektakël dhe emocione deri në sekondat e fundit në javën e 34-t të La Ligës, ku Barcelona merr një fitore të artë 2-1 në transfertë ndaj Osasunës dhe sheh gjithnjë e më pranë titullin kampion. Për më shumë se 80 minuta, sfida mbetet e bllokuar, me të dyja skuadrat që nuk arrijnë të gjejnë rrugën […]

Spektakël dhe emocione deri në sekondat e fundit në javën e 34-t të La Ligës, ku Barcelona merr një fitore të artë 2-1 në transfertë ndaj Osasunës dhe sheh gjithnjë e më pranë titullin kampion.

Për më shumë se 80 minuta, sfida mbetet e bllokuar, me të dyja skuadrat që nuk arrijnë të gjejnë rrugën e rrjetës. Por në minutën e 81-të shpërthen ndeshja: Rashford, i futur nga stoli, kroson saktë për Lewandowskin dhe sulmuesi polak nuk gabon me kokë, duke zhbllokuar rezultatin.

Barcelona nuk ndalet dhe vetëm pesë minuta më vonë dyfishon avantazhin. Fermin Lopez shërben për Ferran Torres, i cili me një goditje të saktë me të djathtën mposht portierin vendas dhe afron edhe më shumë skuadrën e Flick drejt titullit.

Megjithatë, emocioni nuk mungon: Osasuna reagon menjëherë dhe ngushton shifrat me Garcian, që shënon me kokë pas një aksioni nga krahu i majtë. Minutat shtesë janë të tensionuara, por rezultati mbetet i pandryshuar dhe Barcelona feston një sukses shumë të rëndësishëm.

Tani sytë janë nga Madridi: nëse Reali nuk arrin të fitojë ndaj Espanyolit të dielën në mbrëmje, Barcelona shpallet matematikisht kampione. Në të kundërt, gjithçka do të vendoset në El Clasicon e 10 majit në Camp Nou.

Në ndeshjet e tjera, Atletico Madrid bën detyrën në transfertë ndaj Valencias, duke fituar 2-0. Trajneri Simeone i beson të rinjve dhe ata përgjigjen në mënyrën më të mirë: Luque dhe Cubo, dy talente të brezave të rinj, realizojnë golat që sigurojnë tre pikët për madrilenët, që tani fokusohen tek sfida e së martës, ajo e gjysmëfinales së kthimit ndaj Arsenalit në Londër.