“Meeting of Styles” – Festivali i grafiteve në Prishtinë
120 artistë nga mbi 25 shtete të ndryshme të botës po qëndrojnë këto ditë në Prishtinë, në kuadër të festivalit të grafiteve “Meeting of Styles”.
![](https://24-ore.com/wp-content/uploads/2023/07/IMG_0582-780x470.jpeg)
Chus është një artist italian që viziton Kosovën për herë të parë. Në një bisedë me Zërin e Amerikës ai tha se është i befasuar për të mirë meqë para se të vinte kishte një lloj paragjykimi për Kosovën dhe vendet e Ballkanit në përgjithësi.
“Është hera e parë që vizitoj një vend të Ballkanit, do të gënjeja nëse them se nuk kam pasur paragjykime për shkak se nuk e kam njohur këtë rajon dhe mbaja mend vetëm nga fëmijëria që kishte një luftë këtu, por kurrë nuk kam qenë për vizitë dhe nuk dija cfarë të prisja. Jam i befasuar shumë për të mirë”, tha ai.
Anea Kuqi, bashkërenduese për mediat e këtij festivali, thotë se ai po rritet nga viti në vit duke përmbushur synimin për promovimin e Kosovës në rrafshin ndërkombëtar.
“Po rritet edhe puna edhe veprimtaritë që zhvillohen, këtë vit është edhe punëtoria ku mund të shihet puna e artistëve se si zhvillohet hap pas hapi dhe janë të ftuar njerëzit nga të gjitha moshat, gjithashtu ka edhe ngjyrosje të fytyrës, muzikë, është edhe urban bazari ku artistët e rinj mund t’i shesin krijimet e tyre këtu në festival”, tha ajo.
![](https://gdb.voanews.com/01000000-0a00-0242-366d-08db91152cef_w650_r1_s.jpg)
Artistja Line, vjen nga Zvicra për të tretën herë në Kosovë për t’u bërë pjesë e këtij festivali.
“Kam ardhur me bashkëshortin tim i cili gjithashtu është artist dhe vajzën tonë dy vjeçe. Kosova është një vend shumë i përshtatshëm për familje, ka energji të mirë, na pëlqen shumë ky vend. Festivali është një mundësi e mirë për neve të takohemi me artistë të tjerë”, thotë ajo.
![](https://gdb.voanews.com/01000000-0a00-0242-2241-08db91152ce1_w650_r1_s.jpg)
“Meeting of Styles” filloi për herë të parë në Gjermani në vitin 2002, si një nismë e admiruesve të grafitit, me synim të mbështetjes së shkëmbimit ndërkulturor mes vendeve të ndryshme. Në Kosovë këtë vit mbahet edicioni i shtatë i këtij festivali, që zgjatë tre ditë dhe zhvillohet në rrugën B në Prishtinë.