Merz mesazh për protestat në rajon: Dhuna nuk duhet të jetë kurrë opsion nga asnjëra palë

Kancelari gjerman, Friedrich Merz, i bëri thirrje që vendet e Ballkanit Perëndimor të mos mbeten të bllokuara në të kaluarën, duke paralajmëruar se retorika përçarëse dhe polarizimi nuk ndihmojnë në ndërtimin e një të ardhmeje më të mirë evropiane.

Në fjalimin hapës të Samitit të Procesit të Berlinit, Merz, shteti i të cilit është një nga mbështetësit kryesorë të Procesit të Berlinit, foli edhe për protestat që po zhvillohen në rajon dhe në disa vende të Bashkimit Evropian. Ai vlerësoi se këto ngjarje dërgojnë një mesazh të qartë për nevojën e vazhdimit të procesit të zgjerimit dhe që qytetarët të përfitojnë prej tij.

Të rinj në disa vende të Evropës, nga Portugalia deri në Shqipëri, kanë protestuar javët e fundit për kushtet në shkolla, çmimet e banimit dhe kostot e jetesës. Protestat në disa raste janë përshkallëzuar në trazira.

Kancelari gjerman theksoi se dhuna nuk duhet të jetë kurrë një opsion për asnjërën palë, megjithëse pranoi se kjo është veçanërisht e vështirë për t’u arritur “nëse e kaluara na pengon plotësisht”.

“Retorika përçarëse dhe polarizimi në rritje nuk do të çojnë në një Evropë më të sigurt, më të lirë dhe më të begatë. Historia nuk do t’i shikojë me sy të mirë ata që përçajnë në këto kohë të ndërlikuara”, nënvizoi Merz.

Ai kujtoi gjithashtu se në vitin 2018, në samitin e Londrës, liderët e vendeve pjesëmarrëse në Procesin e Berlinit kishin refuzuar së bashku gjuhën e urrejtjes dhe glorifikimin e kriminelëve të luftës.

“Nëse duam të krijojmë një të ardhme më të mirë për fëmijët tanë, nuk duhet t’i hedhim benzinë zjarrit, por duhet të ecim përpara mbi bazën e vlerave evropiane”, tha kancelari gjerman.